Sərxoş sürücülərə qarşı cəzalar sərtləşdirilməlidirmi? – Hüquqşünasdan açıqlama
Sərxoş vəziyyətdə avtomobil idarə edilməsi həm sürücünün, həm də digər hərəkət iştirakçılarının həyatı üçün ciddi təhlükə yaradır. Belə hallarda tətbiq edilən cəzaların çəkindirici təsiri və təkrar pozuntuların qarşısının alınması məsələsi aktuallığını qoruyur. Mövcud qanunvericilik sərxoş vəziyyətdə avtomobil idarə edən şəxslərin məsuliyyətə cəlb olunması üçün kifayət qədər təsirli mexanizmlər nəzərdə tuturmu və təkrar pozuntuların qarşısını almaq üçün hansı dəyişikliklərə ehtiyac var?
Hüquqşünas Tural Həsənli Median.Az-a açıqlamasında deyib ki, sərxoş vəziyyətdə avtomobil idarə etmək sadəcə yol hərəkəti qaydalarının pozulması deyil, həm də insanların həyatını təhlükəyə atan ciddi hüquq pozuntusudur:
Hüquqşünas Tural Həsənli Median.Az-a açıqlamasında deyib ki, sərxoş vəziyyətdə avtomobil idarə etmək sadəcə yol hərəkəti qaydalarının pozulması deyil, həm də insanların həyatını təhlükəyə atan ciddi hüquq pozuntusudur:
“Belə sürücülər sükan arxasına keçməklə yalnız öz həyatlarını deyil, avtomobildə olan sərnişinlərin və digər hərəkət iştirakçılarının da təhlükəsizliyini riskə atırlar. Bu sahədə əsas məqsəd yalnız qayda pozan şəxsi cərimələmək deyil, eyni zamanda onun gələcəkdə eyni əməli təkrar etməsinin qarşısını almaq olmalıdır. Bunun üçün qanunvericilikdə nəzərdə tutulan cəzalarla yanaşı, nəzarət və profilaktik tədbirlər də gücləndirilməlidir. Mövcud qanunvericiliyə əsasən, İnzibati Xətalar Məcəlləsinin 333-cü maddəsində sərxoş vəziyyətdə avtomobil idarə etməyə görə konkret cəzalar müəyyən edilib. Belə ki, ilk dəfə bu qaydanı pozan sürücü 400 manat cərimə edilə və ya 6 aydan 1 ilədək sürücülük hüququndan məhrum oluna bilər. Eyni hal bir il ərzində təkrar baş verdikdə isə sürücülük hüququ 2 il müddətinə məhdudlaşdırılmaqla 400-500 manat cərimə və ya 15 günədək inzibati həbs tətbiq edilə bilər”.
O qeyd edib ki, bu cəzalar müəyyən çəkindirici təsirə malik olsa da, problemin tam həlli üçün təkcə cərimələrin artırılması kifayət deyil:“Çünki bəzi sürücülər cəriməni ödəməklə məsuliyyətdən yayınacaqlarını düşünür və yenidən eyni qaydanı pozurlar. Bu baxımdan, ilk növbədə sərxoş sürücülərin aşkarlanması istiqamətində nəzarət gücləndirilməlidir. Xüsusilə gecə saatlarında, istirahət və bayram günlərində yoxlamaların artırılması vacibdir. Təkrar qayda pozan şəxslərə qarşı daha ciddi yanaşma olmalıdır. Sürücülük hüququndan məhrum edilən şəxslərin həmin müddətdə avtomobil idarə etməsinin qarşısı real şəkildə alınmalıdır. Bunun üçün elektron nəzarət və məlumat bazalarının imkanlarından daha səmərəli istifadə edilə bilər. Sərxoş vəziyyətdə avtomobil idarə etməyə görə məsuliyyət yalnız cəza qorxusu yaratmaqla məhdudlaşmamalıdır. İnsanlar anlamalıdırlar ki, sükan arxasına sərxoş vəziyyətdə keçmək bir anlıq məsuliyyətsizlik nəticəsində ağır faciələrə səbəb ola bilər. Əsas məqsəd hadisə baş verdikdən sonra sürücünü cəzalandırmaq deyil, belə hadisələrin ümumiyyətlə baş verməsinin qarşısını almaqdır”.
