İş adamı Hacı İbrahim Nehrəmliyə məxsus Avesta Konserni MMC məhkəməyə verilib.
Median.az Hit.az-a istinadən xəbər verir ki, iddiaçı İqtisadiyyat Nazirliyi yanında Dövlət Vergi Xidməti Bakı şəhəri Lokal Gəlirlər Baş İdarəsidir.
İş Bakı Kommersiya Məhkəməsinin hakimi Kənan Hüseynovun icraatındadır. Martın 12-də hazırlıq iclası keçirilib. Məhkəmə baxışı aprelin 5-nə təyin edilib.
MMC-nin vergi borcuna görə məhkəməyə verildiyi bildirilir.
Hacı İbrahim Nehrəmli Diasporla İş üzrə Dövlət Komitəsinin keçmiş sədri Nazim İbrahimovun qardaşıdır.
Sahibi olduğu Avesta Konserni MMC tikinti şirkətidir. Şirkət “Xəzər adaları” layihəsinin sayəsində populyarlıq qazanmışdı. Bu layihənin müəllifi də Hacı İbrahim Nehrəmli idi. Lakin iş adamı layihəni başa çatdıra bilmədi. Bunun əsas səbəblərindən biri 2015-ci ildə Beynəlxalq Bankdakı kredit qalmaqalı idi.
Həmin vaxt məlum olmuşdu ki, Hacı İbrahim Nehrəmli “Xəzər adaları” layihəsi üçün bankdan 850 milyon manat kredit götürüb. Odövrkü məzənnə ilə bu, 1 milyard dollardan artıq edirdi. Lakin iş adamı borcunun 450 milyon manat olduğunu iddia edirdi. İş adamı krediti ödəmədiyinə görə 2015-ci il mayın 13-də Baş Mütəşəkki Cinayətkarlığa Qarşı Mübarizə İdarəsinin (BMCQMİ) əməkdaşları tərəfindən saxlanmışdı. Hacı İbrahim bank qarşısındakı öhdəliklərini yerinə yetirməyi vəd edəndən sonra mayın 27-də sərbəst buraxılmışdı.
Bir neçə gün əvvəl isə Avesta Konsernində baş mühasib işləyən Vaqif Bağırovun cinayət işi üzrə ibtidai istintaqın başa çatdığı məlumat yayılmışdı. O, Cinayət Məcəlləsinin 178.3.2-ci (dələduzluq; külli miqdarda törədildikdə) və 313-cü (vəzifə saxtakarlığı) maddələri ilə təqsirləndirilir. Bildirilir ki, cinayət işi Bakı Ağır Cinayətlər Məhkəməsində hakim Azər Paşayevin icraatında araşdırılacaq. Vaqif Bağırov İnterpol xətti ilə beynəlxalq axtarışa verildikdən sonra həbs edilib.
Şahidi olduğunuz hadisələri çəkib bizə göndərin!
Son Əlavə