Bayram günlərində işləyənlərə əlavə əməkhaqqı necə hesablanmalıdır? – AÇIQLAMA
Noyabr ayında bayram günləri ilə əlaqədar bir sıra tarixlər qeyri-iş günü olacaq. Bununla belə, fəaliyyətini davam etdirən müəssisə və təşkilatlarda çalışan şəxslər həmin günlərdə də işə cəlb oluna bilərlər. Belə hallarda işçilərin əməkhaqqının necə hesablanması və onlara əlavə ödənişin edilib-edilməməsi məsələsi aktuallaşır.
Mövzu ilə bağlı hüquqşünas Elnur Məmmədov Median.Az-a açıqlamasında deyib ki, Azərbaycan Respublikasının Əmək Məcəlləsinə əsasən, işçinin bayram və ya digər qeyri-iş günündə işə cəlb edilməsi onun həmin günə görə qanunla müəyyən edilmiş əlavə ödəniş hüququnu aradan qaldırmır:
Mövzu ilə bağlı hüquqşünas Elnur Məmmədov Median.Az-a açıqlamasında deyib ki, Azərbaycan Respublikasının Əmək Məcəlləsinə əsasən, işçinin bayram və ya digər qeyri-iş günündə işə cəlb edilməsi onun həmin günə görə qanunla müəyyən edilmiş əlavə ödəniş hüququnu aradan qaldırmır:
“Bu məsələdə əsas hüquqi norma Əmək Məcəlləsinin 164-cü maddəsidir. Həmin maddə bayram və ümumxalq hüzn günlərində görülən işə görə əməyin ödənilməsi qaydasını müəyyən edir. Əmək Məcəlləsinin 164-cü maddəsinə əsasən, ödəniş işçinin əməkhaqqı sistemindən asılı olaraq müəyyən edilir. Vaxtamuzd sistemində çalışanlara gündəlik (saatlıq) tarif maaşının ən azı iki misli məbləğində; İşəmuzd sistemində çalışanlara ikiqat işəmuzd qiymətləri ilə; Aylıq əməkhaqqı alanlara iş aylıq iş vaxtı norması daxilində görülübsə, əsas maaşdan əlavə ən azı bir günlük vəzifə maaşı, aylıq norma aşılmaqla görülübsə, əlavə olaraq ən azı ikiqat gündəlik vəzifə maaşı ödənilməlidir. İşçinin arzusu ilə əlavə əməkhaqqı əvəzinə ona başqa istirahət günü də verilə bilər”.
O qeyd edib ki, Əmək Məcəlləsinin 164-cü maddəsində nəzərdə tutulan əlavə ödəniş işəgötürən üçün məcburidir:“Tərəflərin razılığı ilə qanunvericilikdə müəyyən edilmiş minimumdan aşağı ödəniş tətbiq edilə bilməz. İşəgötürənin müəssisənin fəaliyyətinin davam etməsini, işçinin əmək müqaviləsi üzrə vəzifələrini və ya daxili qaydaları əsas gətirərək əlavə ödənişdən imtina etmək hüququ yoxdur. Eyni zamanda, Əmək Məcəlləsinin 107-ci maddəsinə görə, bayram və istirahət günlərində işə cəlbetmə yalnız qanunla nəzərdə tutulmuş müstəsna hallarda mümkündür. Fasiləsiz istehsalat, ticarət, ictimai iaşə, rabitə və nəqliyyat müəssisələri də bu istisnalara daxildir. Azərbaycan Respublikasının Əmək Məcəlləsinə əsasən, işçinin bayram və ya digər qeyri-iş günündə işə cəlb edilməsi onun həmin günə görə qanunla müəyyən edilmiş əlavə ödəniş hüququnu aradan qaldırmır”.
