Elektrikli avtomobillərin Azərbaycanda sayının artması avtomobil bazarında yeni tendensiya yaradıb. Bu avtomobillərin yanacaq xərclərinin olmaması və texniki xidmət xüsusiyyətləri istehlakçıların seçimlərinə təsir edən amillərdəndir.

Elektrikli avtomobillərin sayının artması Azərbaycanda ənənəvi avtomobillərin qiymətinə və ikinci əl bazarına necə təsir göstərə bilər?

Mövzu ilə bağlı fikirlərini bölüşən avtomobil üzrə ekspert Elgiz Mehdiyev Median.Az-a deyib ki, hazırda hər kəs elektrik avtomobili ilə bağlı öz seçiminin qarşısındadır:

“Bu avtomobillərin Azərbaycanda, xüsusilə də Bakı şəhərində istifadəsi getdikcə genişlənir. Lakin onların texniki problemlərinin olub-olmaması ilə bağlı tam və dəqiq nəticə çıxarmaq hələ tezdir. Çünki elektrik avtomobilləri ilə bağlı texniki nasazlıqların müəyyənləşdirilməsi və aradan qaldırılması əsasən rəsmi diler mərkəzlərində həyata keçirilir. Bu avtomobillər hələ geniş şəkildə kiçik və müstəqil servis mərkəzlərinə müraciət etmirlər. Ona görə də onların uzunmüddətli istismarı zamanı hansı texniki problemlərin ortaya çıxacağı barədə hazırda tam təsəvvür formalaşmayıb”.
O qeyd edib ki, müəyyən nasazlıqla üzləşən avtomobillər əsasən rəsmi dilerlərə müraciət edir:
“Dilerlər isə həmin avtomobilləri zəmanət çərçivəsində qəbul edərək yaranmış problemi aradan qaldırırlar. Bu səbəbdən elektrik avtomobillərinin texniki dayanıqlığı ilə bağlı daha geniş nəticələrə gəlmək üçün onların daha uzun müddət və daha geniş şəkildə istismar olunmasını gözləmək lazım gəlir”.

Ayselскачать dle 11.3