Əfqanıstanda vəziyyət nisbətən sabit olaraq qiymətləndirilsə də, ölkə hələ də dünyanın ən böyük humanitar böhranlarından birini yaşayır.

Bu barədə BMT Təhlükəsizlik Şurasının iclasında Əfqanıstanda BMT yardım missiyasının (UNAMA) icraçı rəhbəri Corcett Qanyon məlumat verib.

Qanyon bildirib ki, iqtisadi göstəricilər artım nümayiş etdirsə də, bu irəliləyiş ciddi demoqrafik və sosial problemlərlə məhdudlaşır. 2023-cü ildən bəri ölkəyə təxminən 5,9 milyon vətəndaş qayıdıb, 2026-cı ildə isə daha 2,8 milyona qədər əfqan vətəndaşının geri dönəcəyi gözlənilir.

BMT-nin məlumatına görə, hazırda Əfqanıstanda 21,9 milyon insan humanitar yardıma ehtiyac duyur ki, bu da əhalinin təxminən 45%-ni təşkil edir. Ölkə əhalisinin yarıdan çoxu 25 yaşdan kiçikdir, lakin iş yerlərinin sayı olduqca azdır. Eyni zamanda kənd təsərrüfatı quraqlıq və su çatışmazlığından ciddi zərər görür.

Qanyon həmçinin qadınlar və qızların vəziyyətinin pisləşdiyini bildirib. BMT-nin qiymətləndirmələrinə əsasən, 3,8 milyon qız təhsil müəssisələrinə getmir. Qadınların təhsil və əmək fəaliyyətinə qoyulan məhdudiyyətlər isə artıq Əfqanıstan iqtisadiyyatına zərər vurur və səhiyyə ilə təhsil sahələrində ixtisaslı kadr çatışmazlığı riskini artırır.//qaynar.azскачать dle 11.3