Hər gün istifadə etdiyimiz duz nə qədər təmizdir? – AÇIQLAMA

“Duzun göl, dəniz və qaya duzu kimi müxtəlif növləri var. Naxçıvan duzu da qaya duzudur. Bu duzlar qayadan çıxarıldıqdan sonra torpaqdan təmizlənir, arındırılır və süfrəmizə gəlib çatır. Duzun özü bakterial çirklənməyə məruz qalmır. Təbii ki, bəzi hallarda üzvi maddələrin və nəmin təsiri rol oynaya bilər. Ancaq duzda kif yaranmır və o, adi şəraitdə bakterial çirklənməyə asanlıqla məruz qalmır. Torpaq qarışığı məsələsinə gəlincə, sosial şəbəkələrdə bu cür görüntülər bəzən diqqət çəkmək, bəyənmə və baxış sayı toplamaq məqsədilə paylaşılır. Mən də həmin videonu izləmişəm. Orada nümayiş etdirilənlər mənə kifayət qədər əsaslı görünmədi. Açığı, Naxçıvan duzunun bu dərəcədə lil-palçıqla qarışmış formasına rast gəlməmişəm. Özüm də Naxçıvan duzundan istifadə edirəm və onu yeməklərdə işlədirəm. Düzdür, duzun tərkibində tam təmizlənməmiş hissələrə rast gəlmək mümkündür, amma bu, videoda göstərildiyi kimi lil-palçıq səviyyəsində deyil”.

“Qayanın tərkibində olan bəzi maddələr duzun içərisində rəng fərqləri şəklində, o cümlədən boz çalarlarla görünə bilər. Buna görə də duzun rəngindəki hər fərqi avtomatik olaraq çirklənmə kimi qiymətləndirmək düzgün deyil. Bununla belə, Naxçıvan duzunun lazımi qaydada emal olunması, qablaşdırılması və satışa çıxarılması vacibdir. Əgər emal prosesi düzgün aparılmırsa, bu barədə məlumatım yoxdur. Naxçıvan duzu düzgün şəkildə qablaşdırılaraq satışa çıxarılır. Onun turşuların hazırlanması üçün nəzərdə tutulan növləri də, gündəlik yeməklərdə istifadə olunan növləri də var. Naxçıvan duzu keyfiyyətli məhsuldur və mən özüm də onu tövsiyə edirəm. Çünki bu, bizim milli sərvətimizdir. Himalay duzunun da müəyyən faydaları ola bilər, amma öz milli sərvətimiz olan Naxçıvan duzunun da dəyərini bilməliyik. Yayılan videodakı iddialar mənə əsassız görünür. İnsanlar belə görüntülərlə qarşılaşanda tələsik nəticə çıxarmamalı və hər deyilənə inanmamalıdırlar. Məsələyə son nöqtəni isə müvafiq qurumların araşdırması qoymalıdır. Qida Təhlükəsizliyi Agentliyi həmin duzdan nümunələr götürərək laborator müayinələr apara bilər. Məsələn, hər hansı mağazadan Naxçıvan duzu alınıb yoxlanıla, onun tərkibi, təmizliyi və qida təhlükəsizliyi tələblərinə uyğunluğu müəyyən edilə bilər. Beləliklə, məsələ şəxsi mülahizələrə deyil, laborator nəticələrə əsaslanaraq qiymətləndirilər”.