Ermənistan məhkəməsi din xadiminin cəzasını dəyişdi

Ölkədə hakimiyyəti ələ keçirməyə çağırış etdiyinə görə iki il müddətinə azadlıqdan məhrum edilən Erməni Apostol Kilsəsinin Şirak yeparxiyasının rəhbəri, arxiyepiskop Mikael Adjapaxyanın cəzası ev dustaqlığı ilə əvəz olunub.

Bu barədə Ermənistan mətbuatı məlumat yayıb.

"Məhkəmə, həmçinin qərar verib ki, stasionar müalicə müddətində ev dustaqlığı yeri tibb müəssisəsi hesab ediləcək. Məhkəmə ruhaninin qohumları, vəkilləri, ruhaniləri və Şirak yeparxiyasının inzibati işçiləri istisna olmaqla ziyarətlərinə məhdudiyyətlər qoyub", - deyə hakim bildirib.

Bundan əvvəl İrəvan məhkəməsi arxiyepiskopu Ermənistanda hökuməti ələ keçirməyə açıq çağırış etməkdə günahkar bilərək, iki il müddətinə azadlıqdan məhrum etmişdi.