İqtisadiyyat Nazirliyi yanında Əmlak Məsələləri Dövlət Xidməti (ƏMDX) Azərbaycan gömrüyünün saxladığı tibb, təsərrüfat, inşaat və elektronika mallarını 5-ci dəfə - qiyməti 50 % aşağı salınmaqla açıq hərraca çıxarır.
Median.Az quruma istinadən xəbər verir ki, hərrac aprelin 21-də, saat 11:00-da Əmlak Xidmətləri Məkanında (Bakı şəhəri, Nizami rayonu, Xəlil Rza Ulutürk küçəsi, 20 ünvanında) keçiriləcək.
İnvestorlara start qiyməti 18 656 manat olan 375 adda tibb, təsərrüfat və inşaat malları, eləcə də start qiyməti 7 303 manat təşkil edən 369 adda elektronika məhsulu təklif olunacaq.
Hərracda iştirak etmək üçün sifariş vermiş (əmlakın start qiymətinin 5 %-i qədər beh və iştirak haqqı ödəmiş) şəxslərə satışa çıxarılan əmlakla əvvəldən tanış olmaq imkanı yaradılır (hər həftənin cümə axşamı, saat 14:00-17:00-da). Əmlaklar Dövlət Gömrük Komitəsinin "Azərterminalkompleks" Birliyinin anbarında yerləşir.
Nazirlər Kabinetinin 19 oktyabr 2012-ci ildə təsdiqlədiyi “Dövlət mülkiyyətinə keçirilmiş mallar və nəqliyyat vasitələrinin gömrük hərraclarında satılması Qaydaları”na əsasən gömrük hərraclarında iştiraka görə hərrac iştirakçılarından əmlakın ilkin satış qiymətinin 0,5 %-dən çox olmamaq şərtilə iştirak haqqı alınır. Satışa çıxarılan əmlakla tanış olduqdan sonra hərracın keçirilməsinə 5 gün qalmış hərraca buraxılmış şəxslər hərracın təşkilatçısına hərracda iştirak edib-etməyəcəkləri barədə öz qərarlarını yazılı surətdə bildirməlidirlər.
Bundan başqa, Qaydalara əsasən, gömrük orqanlarının, Komitənin tabeliyində olan qurumların işçiləri və onların ailə üzvləri dövlət mülkiyyətinə keçirilmiş malları birbaşa, yaxud dolayısı ilə (digər şəxslər vasitəsilə) ala bilməzlər.
Şahidi olduğunuz hadisələri çəkib bizə göndərin!
Son Əlavə