Ötən mövsümü “Sumqayıt” klubunda oynamış Əmir Ağayev Azərbaycan millisinə çağırılıb.
Yunanıstanın “Atromitos” klubunun rəsmi saytı xəbər verir ki, 28 yaşlı yarımmüdafiəçi Azərbaycan yığmasından dəvət alıb.
AFFA tərəfindən bununla bağlı israilli futbolçunun yeni klubu olan “Atromitos”a məktub daxil olub. Məktubda bildirilir ki, Ağayev milli komandanın 31 avqust - 8 sentyabr tarixlərindəki təlim-məşq toplantısında düşərgədə olmalıdır. Komandamız UEFA Millətlər Liqası çərçivəsində sentyabrın 5-də Lüksemburqla Bakıda, ayın 8-də isə Kiprlə səfərdə qarşılaşmalıdır.
Qeyd edək ki, İsraildə anadan olmasına baxmayaraq, valideynləri Azərbaycandan olduğu üçün Ağayevin milli pasportu var. O, ilk dəfə millimizə çağırılır.