Hava ilə bağlı vacib xəbərdarlıq: Bu məhsullar bahalaşa bilər

Son günlər ölkənin müxtəlif bölgələrində müşahidə olunan aramsız və intensiv yağışlar kənd təsərrüfatı sahələrində narahatlıq yaradıb. Yağıntıların əkin sahələrinə, məhsulun keyfiyyətinə və yığım prosesinə təsir göstərə biləcəyi bildirilir.
 
Bəs davam edən yağışlar bazarda kənd təsərrüfatı məhsullarının qiymətlərinin artmasına səbəb olacaqmı?
 
Median.Az bildirir ki, mövzu ilə bağlı konkret.az-a açıqlama verən Liberal İqtisadçılar Mərkəzinin sədri Akif Nəsirli bildirib ki, əlverişsiz hava şəraiti kənd təsərrüfatı istehsalına birbaşa təsir göstərir.
 
Liberal İqtisadçılar Mərkəzinin sədri Akif Nəsirli: “İdxalın bu qədər  artması xüsusən ciddi siqnaldır”
 
Onun sözlərinə görə, aramsız və güclü yağışlar əkin sahələrinin su altında qalmasına, məhsulların zədələnməsinə və yığım prosesinin çətinləşməsinə səbəb ola bilər:
 
“Belə hallarda bazara çıxarılan məhsulun həcmi azalır. Təklifin azalması isə bir çox kənd təsərrüfatı məhsulunun qiymətinin yüksəlməsi ilə nəticələnəcək. Eyni zamanda, bəzi məhsullarda keyfiyyət itkisi yaranır ki, bu da onların bazar dəyərinə mənfi təsir göstərir. Nəticədə yağışların təsiri həm qiymət artımı, həm də məhsulun keyfiyyətində dəyişikliklər şəklində özünü göstərəcək”.
 
Ekspert hesab edir ki, yağıntıların davam etməsi və kənd təsərrüfatı sahələrinə vurduğu ziyanın miqyası yaxın aylarda bazardakı qiymət dinamikasına da təsir göstərəcək. Hazırda isə vəziyyətin inkişafı hava şəraitinin necə dəyişəcəyindən asılıdır.