Saç tökülməsinin əsas səbəbləri açıqlandı

Son illər həm qadınlar, həm də kişilər arasında saç tökülməsi problemi daha geniş yayılıb.
 
Gündə müəyyən sayda saç telinin tökülməsi normal hesab olunsa da, həddindən artıq saç itkisi müxtəlif sağlamlıq problemlərindən xəbər verə bilər.

Ekspertlərin sözlərinə görə, saç tökülməsinin ən əsas səbəblərindən biri genetik faktorlardır. Ailəsində keçəllik problemi olan insanlarda saç seyrəlməsi daha erkən yaşlarda müşahidə oluna bilər.

Stress və psixoloji gərginlik də saç tökülməsini artıran əsas amillərdən sayılır. Uzunmüddətli stress saç köklərinin zəifləməsinə və saçların daha sürətli tökülməsinə səbəb olur.

Mütəxəssislər qeyd edirlər ki, düzgün qidalanmamaq da saç sağlamlığına mənfi təsir göstərir. Dəmir, sink, vitamin və protein çatışmazlığı saçların zəifləməsinə gətirib çıxarır. Sərt pəhriz saxlayan insanlarda bu problemə daha çox rast gəlinir.

Hormonal dəyişikliklər, xüsusilə qalxanabənzər vəzi problemləri və hormonal balans pozğunluğu da saç tökülməsinə səbəb ola bilər. Bundan başqa, saçlara tez-tez fen, boya və digər kimyəvi vasitələrin tətbiqi saç köklərini zədələyir. Mütəxəssislər saç tökülməsi uzun müddət davam etdiyi halda həkim müayinəsindən keçməyi tövsiyə edirlər.
//sfera.az