Təhlükəsizlik riski yaranarsa, turistlər nə etməlidir? – Ekspertdən tövsiyə

Azərbaycan Xarici İşlər Nazirliyinin Fransa ilə bağlı səyahət xəbərdarlığı turistlər arasında müəyyən suallar yaradır. Bəzən vətəndaşlar səfərlərini aylar öncədən planlaşdırır, aviabiletləri və hotelləri əvvəlcədən bron edirlər. Belə hallarda xəbərdarlığın onların səfər planlarına və çəkdikləri xərclərə necə təsir edəcəyi maraq doğurur.

XİN-in Fransa ilə bağlı səyahət xəbərdarlığı fonunda artıq bilet və hotel bronu edən turistlər nə etməlidirlər?

Bu barədə turizm eksperti Əziz Şiriyev Median.Az-a açıqlama verib.

O deyib ki, turizm həssas sahədir və baş verən istənilən proses ona birbaşa təsir göstərir:

“Bu baxımdan, insan təhlükəsizliyi ilə bağlı hər hansı problem yaranarsa, maddi məsələlər ikinci plana keçməlidir. Əgər şəxslər Fransa vizası alıblarsa və ya otel bron ediblərsə, həmin rezervasiyaları ləğv etmək mümkündür. Artıq aviabilet alınıbsa və viza mövcuddursa, alternativ variant kimi həmin ölkəyə səfər etmək və oradan Avropanın digər ölkələrinə keçmək olar. Şengen vizası bir sıra Avropa ölkələrinə səyahət imkanı yaradır. Buna görə də, belə bir viza əldə edilibsə, səfəri tamamilə ləğv etmək əvəzinə, imkanları dəyərləndirərək Avropanın digər ölkələrinə səyahət etməyi tövsiyə edərdim. Digər hallarda isə turizm şirkətləri və aviaşirkətlərin müəyyən etdiyi şərtlərdən asılı olaraq, biletləri geri qaytarmaq və ya səfər tarixini dəyişdirmək, eləcə də otel rezervasiyalarını ləğv etmək mümkündür”.

Aysel