Fransada 1889-cu ildə inşa edilən məşhur Eyfel Qülləsi-nə aid orijinal 14 pilləlik pilləkən hissəsi Parisdə keçirilən hərracda 450 min 160 avro (təxminən 837 min 600 Azərbaycan manatı) qarşılığında satılıb.

Median.Az xəbər verir ki, Parisdəki Artcurial hərrac evində təşkil olunan satışda Qustav Eyfel tərəfindən layihələndirilən qüllənin ikinci və üçüncü mərtəbələrini birləşdirən 2,75 metr hündürlüyündə və 1,4 ton ağırlığında olan orijinal pilləkən hissəsi satışa çıxarılıb. Təxmini dəyəri 120–150 min avro (təxminən 222–278 min Azərbaycan manatı) olan bu tarixi parça gözləntiləri qat-qat aşaraq təxminən üç dəfə baha qiymətə alıcı tapıb.

Məlumata görə, qüllənin orijinal pilləkənlərinin 160 metrlik hissəsi təxminən 40 il əvvəl kiçik bölmələrə ayrılaraq satışa çıxarılıb. Daha sonra isə onların yerinə liftlər quraşdırılıb.

Əvvəllər, 2008-ci ildə həmin pilləkənin başqa bir hissəsi ABŞ-li bir kolleksiyaçıya 553 min avro (təxminən 1 milyon 29 min Azərbaycan manatı) qarşılığında satılaraq rekord qiymət müəyyən edib. Hazırda bu cür tarixi parçalar dünyanın müxtəlif yerlərində, o cümlədən Nyu-Yorkdakı Azadlıq Heykəli ətrafında, Yaponiyada Yoşii Fondunun bağlarında və müxtəlif şəxsi kolleksiyalarda sərgilənir.

Satılan pilləkən hissəsinin yeni sahibinin kimliyi isə açıqlanmayıb.скачать dle 11.3