Ali Məhkəmədə Bakı şəhər sakinləri Sənan Quliyevin CM-nin 120.2.2 (xuliqanlıq niyyəti ilə qəsdən adam öldürmə), 221.2.1 (xuliqanlıq, bir qrup şəxs tərəfindən törədildikdə), 221.2.2 (xuliqanlıq, ictimai qaydanın qorunması üzrə vəzifəni yerinə yetirən şəxsə müqavimət göstərməklə törədildikdə), 221.3 (xuliqanlıq, silahdan və ya silah qismində istifadə edilən əşyaları tətbiq etməklə törədildikdə) və Mövlud Səfərovun CM-nin 221.2.1 (xuliqanlıq, bir qrup şəxs tərəfindən törədildikdə), 221.2.2 (xuliqanlıq, ictimai qaydanın qorunması üzrə vəzifəni yerinə yetirən şəxsə müqavimət göstərməklə törədildikdə), 221.3 (xuliqanlıq, silahdan və ya silah qismində istifadə edilən əşyaları tətbiq etməklə törədildikdə) maddələri ilə məhkum olunmalarına dair hökmdən verilən kassasiya şikayəti üzrə məhkəmə prosesi keçiriləcək.

Median.Az xəbər verir ki, ittiham aktına əsasən, qətl 2015-ci il aprelin 21-də Tbilisi prospekti, 32 ünvanında yerləşən “Avropa” otelində baş verib. Hotelin nəzdində yerləşən idman zalında münaqişə zəminində şəhər sakinləri, "Zaminbank" KB Nəsimi filialının müdiri Azər Məmmədov (1985-ci il təv.) döş qəfəsindən bir bıçaq xəsarəti və tanışı Ruslan Əfəndiyev (1971-ci il təv.) iki bıçaq xəsarəti alıblar. Hər iki yaralı Kliniki Tibbi Mərkəzə çatdırılsalar da, A.Məmmədovun həyatını xilas etmək mümkün olmayıb.

Daxil olan məlumatla əlaqədar araşdırmaya başlayan Nəsimi RPİ və 20-ci polis bölməsi əməkdaşları cinayəti törədənin Sənan Quliyev olduğunu müəyyən ediblər. Həmin axşam keçirilən əməliyyat-axtarış tədbirləri nəticəsində Sənan Quliyev və tanışı Mövlud Səfərov saxlanılaraq, istintaqa təqdim olunublar.

Bakı Ağır Cinayətlər Məhkəməsinin hökmü S.Quliyev ömürlük, M.Səfərov 20 il müddətinə azadlıqdan məhrumetmə cəzasına məhkum olunublar.

Bakı Apellyasiya Məhkəməsi işi araşdıraraq, apellyasiya şikayətlərini təmin etməyib.

Məhkumlar kassasiya şikayətləri ilə Ali Məhkəməyə müraciət ediblər.

Ali Məhkəmədə proses iyunun 12-ə təyin olunub.






скачать dle 11.3