Bayramdan sonra iş rejiminə qayıtmaq: Adaptasiya dövrünü necə asanlaşdıraq?
Bayram günlərindən sonra işə qayıtmaq bəzi insanlar üçün çətin ola bilər. Çünki istirahət müddətində insanın gündəlik rejimi dəyişir. Daha gec yatır, gec oyanır, işlə bağlı məsuliyyətlərdən bir qədər uzaqlaşır. Bu səbəbdən işə qayıtdıqda əvvəlki tempə uyğunlaşmaq müəyyən vaxt tələb edir.
Psixoloq Aynur İsmayıl Median.Az-a açıqlamasında qeyd edib ki, insanlar özlərindən dərhal yüksək iş performansı gözləməməlidirlər:
Psixoloq Aynur İsmayıl Median.Az-a açıqlamasında qeyd edib ki, insanlar özlərindən dərhal yüksək iş performansı gözləməməlidirlər:
“İşə qayıdan ilk günlərdə yorğunluq, diqqətin dağılması, həvəssizlik və işə başlamaqda çətinlik yaşana bilər. Bunlar normal hallardır və insanın tənbəl olması demək deyil. Ən vacib məqamlardan biri gündəlik rejimi bərpa etməkdir. Xüsusilə yuxu saatlarına diqqət yetirmək lazımdır. İnsan çalışmalıdır ki, bayramdan sonra əvvəlki yatmaq və oyanmaq saatlarına qayıtsın. Çünki keyfiyyətli yuxu həm əhvala, həm də iş qabiliyyətinə birbaşa təsir edir. Digər tərəfdən, işə qayıdan kimi bütün tapşırıqları eyni anda yerinə yetirməyə çalışmaq düzgün deyil. İşləri vacibliyinə görə sıralamaq və gün ərzində mərhələli şəkildə tamamlamaq daha faydalıdır. Bu, insanın özünü təzyiq altında hiss etməsinin qarşısını alır”.
O deyib ki, iş yoldaşları ilə ünsiyyət də adaptasiya prosesini asanlaşdıra bilər:“Kiçik söhbətlər, müsbət münasibət və kollektivdə xoş atmosfer insanın işə daha rahat köklənməsinə kömək edir. Bir məqamı da unutmaq olmaz ki, bayramdan sonra işə həvəssiz yanaşmaq hər zaman işindən narazı olmaq demək deyil. Bəzən insan sadəcə istirahət rejimindən iş rejiminə keçməkdə çətinlik çəkir. Özümüzə bir qədər vaxt verməliyik. İnsanlar bayramın bitməsini istirahətin sonu kimi deyil, yeni iş dövrünün başlanğıcı kimi qəbul etsinlər. İş və istirahət arasında düzgün tarazlıq qurmaq vacibdir. Çünki insan yalnız işləməklə deyil, vaxtında dincəlməklə də məhsuldar ola bilir”.
