Telefon yoxlamaq sevgi deyil - Psixoloqdan AÇIQLAMA
Münasibətlərdə qısqanclıq bəzən sevginin və bağlılığın ifadəsi kimi qəbul edilir. Lakin telefonun yoxlanılması, ünsiyyətə məhdudiyyət qoyulması və davamlı şübhələr münasibətlərdə nəzarət probleminə çevrilə bilər. Sağlam qısqanclıqla psixoloji təzyiq arasındakı sərhəd haradan keçir və bu davranışlar hansı hallarda təhlükəli sayılır?
Psixoloq Fuad Əsədov Median.Az-a açıqlamasında qeyd edib ki, qısqanclıq və şübhəni bir-birindən fərqləndirmək lazımdır:
Psixoloq Fuad Əsədov Median.Az-a açıqlamasında qeyd edib ki, qısqanclıq və şübhəni bir-birindən fərqləndirmək lazımdır:
“Telefonun yoxlanılması, qarşı tərəfin ünsiyyətinə məhdudiyyət qoyulması qısqanclıq deyil, şübhə və nəzarət davranışlarıdır. Bu cür münasibət insan azadlığını məhdudlaşdırır, onun fundamental hüquqlarına zərər vurur. Ona görə də belə davranışlara müsbət yanaşmaq və onları sevgi əlaməti kimi qiymətləndirmək düzgün deyil. Əksinə, bu, ailə münasibətlərinə, hər iki tərəfin psixoloji sağlamlığına və ümumi rifahına mənfi təsir göstərir”.
O qeyd edib ki, sağlam qısqanclıqla psixoloji təzyiq arasındakı sərhədi müəyyənləşdirərkən əsas meyar davranışın münasibətlərə təsiridir:“Sağlam qısqanclığı müəyyən mənada laqeydliyin əksi kimi qiymətləndirmək olar. Yəni tərəflərin bir-birinin harada olması, nə ilə məşğul olması və gündəlik həyatı ilə maraqlanması münasibətdə diqqət və qayğının göstəricisidir. Əgər tərəflər bir-birinə qarşı tamamilə laqeyd olarsa, bu da ailə münasibətlərinə mənfi təsir göstərə bilər. Lakin bu maraq və diqqət müəyyən həddi aşmamalıdır. Qarşılıqlı qayğı və diqqət hər iki tərəfdə xoş hisslər yaradırsa, bunu sağlam qısqanclıq hesab etmək olar. Əsas məsələ davranışların münasibətə və tərəflərin psixoloji vəziyyətinə necə təsir etdiyini düzgün qiymətləndirməkdir”.
