Həyət evlərinin yerləşdiyi bəzi ərazilərdə sakinlərin evlərinin qarşısındakı yol hissəsini öz hesabına asfaltladığı müşahidə olunur.
Sakinlər bildirirlər ki, bu addımı yolların vəziyyətini yaxşılaşdırmaq və gediş-gəlişi daha rahat etmək məqsədilə atırlar. Bununla belə, yolun ayrı-ayrı ev sahibləri tərəfindən öz təşəbbüsü və vəsaiti hesabına asfaltlanması zamanı hər hansı icazənin tələb olunub-olunmaması sual doğurur. Müvafiq ərazinin mülkiyyət statusu və yolun kimə məxsus olması da bu məsələdə əhəmiyyət daşıyır.

Bununla bağlı hüquqşünas Əkrəm Həsənov Median.Az-a açıqlamasında deyib ki, yolun mülkiyyətçisindən icazə alınmalıdır:

“Yolun mülkiyyətçisi isə dövlət və ya bələdiyyə ola bilər. Müvafiq icazə alınmadıqda İnzibati Xətalar Məcəlləsinin 350-ci maddəsi tətbiq edilir. Həmin maddəyə əsasən, müvafiq icazə almadan və ya alınmış icazənin şərtlərinə əməl etmədən avtomobil yollarında, prospektlərdə və küçələrdə tikinti, qazıntı, yenidənqurma və ya təmir işlərinin aparılmasına, eləcə də avtomobil yollarının layihələndirilməsi, tikintisi, yenidən qurulması və təmiri zamanı yol hərəkətinin təhlükəsizliyinə dair standartlara, qaydalara və normativlərə əməl edilməməsinə görə məsuliyyət nəzərdə tutulur. Belə hallarda fiziki şəxslər 200 manatdan 300 manatadək, vəzifəli şəxslər 1000 manatdan 1500 manatadək, hüquqi şəxslər isə 10 min manatdan 12 min manatadək məbləğdə cərimə edilə bilər”.

Ayselскачать dle 11.3