Beynəlxalq Şahmat Federasiyasının (FIDE) Etika və İntizam Komissiyası rusiyalı şahmatçı, 14-cü dünya çempionu Vladimir Kramnik barəsində qərar çıxarıb.

Bu barədə təşkilatın rəsmi saytında məlumat yayılıb.

Qərara əsasən, rusiyalı qrossmeyster 2 il müddətinə diskvalifikasiya olunub, bunun 1 ili şərti hesab edilir.

FIDE-nin açıqlamasına görə, iş Kramnikin qrossmeyster David Navara və mərhum Daniel Naroditskiyə, həmçinin digər şahmatçılara qarşı sosial şəbəkələrdə və ictimai çıxışlarda etdiyi bəyanatlarla bağlı şikayətlər əsasında başlanıb.

Bildirilir ki, Kramnik həmin şahmatçıları saxtakarlıqda ittiham etmişdi. FIDE isə qeyd edib ki, konkret oyunçuları kifayət qədər sübut olmadan ictimai şəkildə ittiham etmək onların reputasiyasına və psixoloji durumuna ciddi zərər vura bilər və federasiyanın etik standartlarına ziddir.

Kramnik qərarla razılaşmadığını bildirərək apellyasiya verəcəyini açıqlayıb. O, FIDE Etika Komissiyasının ciddi prosedur pozuntularına yol verdiyini iddia edib və qərarın ləğv olunacağına inandığını deyib.

51 yaşlı Kramnik 2000-2007-ci illərdə şahmat üzrə dünya çempionu olub.скачать dle 11.3