"Aktau yaxınlığında AZAL təyyarəsinin qəzasını araşdıran komissiya işini davam etdirir. Hələlik tamamlanma tarixi müəyyən edilməyib, lakin Qazaxıstan tərəfi prosesi sürətləndirmək üçün əlindən gələni edəcək".

Bu barədə "RIA Novosti" Qazaxıstanın Nəqliyyat Nazirliyinə istinadən məlumat yayıb.

Məlumata görə, komissiya mütəxəssislərin materialları üzərində işləyir.

"Komissiya hazırda tədqiqatın nəticələri və görülən işlər barədə hesabatları nəzərdən keçirir", - deyə açıqlamada bildirilib.

Qeyd olunub ki, təyyarə qəzası ilə bağlı istintaqın bütün nəticələri obyektiv olacaq və faktlara əsaslanacaq:

"İstintaq komissiyası balanslı mövqe tutur və bütün nəticələr yalnız faktlara əsaslanaraq obyektiv olacaq".

Xatırladaq ki, 2024-cü il dekabrın 25-də Aktau yaxınlığında Bakıdan Qroznıya uçan AZAL aviaşirkətinin təyyarəsi qəzaya uğrayıb. Təyyarədə beş ekipaj üzvü daxil olmaqla 67 nəfər olub. Onlar Azərbaycan, Rusiya, Qazaxıstan və Qırğızıstan vətəndaşları olub. 29 nəfər sağ qalıb. 2025-ci il yanvarın 7-də Braziliyada Aktau yaxınlığında qəzaya uğramış "Azerbaijan Airlines" təyyarəsinin qara qutularının açılmasının başa çatdığı məlum olub.

Qeyd edilib ki, əldə edilən məlumat Qazaxıstana göndərilib. 2025-ci il fevralın 4-də Qazaxıstan Nəqliyyat Nazirliyi tərəfindən dərc edilmiş qəzanın araşdırılması üzrə ilkin hesabat ortaya çıxıb. Hesabatda hadisələrin xronologiyası və zədələrin fotoşəkilləri təqdim edilib.скачать dle 11.3