Rusiya yük gəmisi "Ursa Mayor" İspaniyanın Agilas şəhəri ilə Əlcəzairin Oran şəhəri arasında Aralıq dənizində partlayış nəticəsində batıb.
Qaynarinfo xəbər verir ki, gəminin 14 ekipaj üzvü İspaniyanın Kartahena limanına dəniz xilasetmə xidməti tərəfindən çatdırılıb. İki nəfər isə itkin düşüb.
Məlumata görə, partlayış bazar ertəsi, yerli vaxtla saat 12:30-da baş verib. Partlayış gəminin əyilməsinə səbəb olub və hadisə baş verən ərazi rus hərbi gəmisinin gəlişinə qədər gəmiçilik üçün təhlükəli zona elan edilib.
Xilasetmə əməliyyatına həmin bölgədə balıqçılıqla məşğul olan bir neçə gəmi qatılıb və daha sonra İspaniya dəniz xilasetmə xidmətinin mütəxəssisləri də əməliyyata qoşulub.
"Ursa Mayor" rəsmi məlumatlara görə, Sankt-Peterburqdan Vladivostoka tranzit keçidi edirmiş. Gəmi dekabrın 11-də yola düşmüş və yanvarın 22-də çatmalı idi.
Gəminin kapitanı bildirib ki, qəza zamanı konteynerlər boş olub.
Lakin "Mediasona" rus nəşri OSINT-analitiklərə istinad edərək bildirib ki, son vaxtlar Aralıq dənizinə beş Rusiya yük gəmisi daxil olub: üçü böyük desant hərbi gəmisi, ikisi isə "Oboronlogistika" şirkətinə məxsus yük gəmiləridir.
"Sparta" və "Ursa Mayor" quru yükləri uzun illər "Suriya ekspresi" adlanan marşrutla Rusiyanın Suriya qoşunlarına təchizat daşıyıb.
Analitiklər güman edir ki, həmin beş gəmi Suriya Tartus və Hmeymimdə yerləşən rus bazalarının təxliyəsi üçün nəzərdə tutulub.
"Oboronlogistika" şirkətinin mətbuat məlumatında qeyd olunub ki, "Ursa Mayor" uzaq şərqə yollanaraq liman infrastrukturunun və Şimal dəniz yolunun inkişafı ilə bağlı dövlət tapşırıqları çərçivəsində iri layihə yükləri daşıyıb. Gəminin Vladivostok terminalının genişləndirilməsi üçün lazım olan 380 tonluq port kranları və yeni buzqıranlar üçün 45 tonluq lük örtüklərini apardığı bildirilib.
Ukrayna Müdafiə Nazirliyinin Baş Kəşfiyyat İdarəsi dekabrın 23-də məlumat yayıb ki, Rusiya Suriyadan silah və texnika çıxarmaq üçün göndərdiyi "Sparta" yük gəmisi hərəkət zamanı sıradan çıxıb.
Xatırladaq ki, əvvəllər Avropa İttifaqı Suriya hakimiyyəti ilə dialoq zamanı Rusiyanın Suriyadakı hərbi mövcudluğuna diqqət yetirməyi planlaşdırdığını bəyan etmişdi.
Şahidi olduğunuz hadisələri çəkib bizə göndərin!
Son Əlavə