Bakı Ağır Cinayətlər Məhkəməsində Ağcabədi rayon sakini Amin Kazımovun CM-nin 120.2.4-cü (xüsusi amansızlıqla qəsdən adam öldürmə), paytaxt sakinləriOzal Həsənov və İnsan Həsənovun CM-nin 221.1-ci (xuliqanlıq) maddəsi ilə təqsirləndirilmələrinə dair cinayət işi üzrə məhkəmə prosesi başa çatıb.

Median.Az xəbər verir ki, bu il martın 4-də Nizami rayonun Qara Qarayev prospektində, kirayə qaldığı evin qarşısında avtomobilin yuyulması üstündə Amin Kazımov 52 yaşlı Yaşar Məmmədovu qətlə yetirib və sonra anadan olduğu Ağcəbədi rayonuna qaçıb. 2 gündən sonra Nizami RPİ 25-ci polis bölməsinin əməkdaşları onu həmin rayonda tutublar. Fakta görə Nizami rayon prokurorluğunda cinayət işi başlanılıb, məhkəmənin qərarı ilə Amin Kazımov barəsində həbs qətimkan tədbiri seçilib.

Qeyd edək ki, hadisədən əvvəl qeyd edilən ünvanın qarşısında gözətçi işləyən Yaşar Məmmədov, Amin Kazımova məhəllədə avtomobil yumasını irad tutub. Buna görə tərəflər arasında mübahisə düşüb. Kazımov Məmmədovu əvvəlcə döyüb, daha sonra üzərində olan bıçaqla ona 7 dəfə zərbə vuraraq, onu qəsdən öldürüb. Zərərçəkmiş xəstəxanaya aparılarkən yolda kəskin qan itirmədən keçinib. Həmin hadisə ərazidəki təhlükəsizlik kamerasına da düşüb.

Məhkəmənin hökmü ilə A.Kazımov 18 il, O.Həsənov və İ.Həsənov 1 il müddətinə azadlıqdan məhrumetmə cəzalarına məhkum olunublar.скачать dle 11.3