Rusiya Prezidenti Vladimir Putinin xarici səfərləri zamanı istifadə etdiyi xüsusi “İl-96-300PU” adi prezident təyyarəsindən daha çox funksiyaya malikdir. “Uçan Kreml” adlandırılan təyyarə böhran zamanı havadan idarəetmə mərkəzinə çevrilə bilir. Bəs Putini göydə qoruyan bu təyyarənin içində nələr var?

Median.Az xəbər verir ki, Putinin Hindistana səfəri zamanı diqqət çəkən məqamlardan biri iki eyni Rusiya prezident təyyarəsinin eyni vaxtda havaya qalxması olub. Putinin təyyarələrdən birində olduğu bildirilsə də onun hansı təyyarə ilə uçduğu açıqlanmayıb. Bu üsulun mümkün təhdidləri çaşdırmaq və Rusiya liderini daşıyan təyyarənin müəyyən edilməsini çətinləşdirmək məqsədi daşıdığı qeyd edilir.

Moskvanın Putinin bəzi xarici səfərləri zamanı buna bənzər təhlükəsizlik tədbirlərindən istifadə etdiyi bildirilir.

Putinin xarici səfərlərində istifadə etdiyi prezident təyyarəsi xüsusi modifikasiya edilmiş “İl-96-300PU” modelidir. Təyyarənin inkişaf etmiş rabitə və təhlükəsizlik sistemlərinə malik olması səbəbilə ona “Uçan Kreml”, bəzi hallarda isə “Qiyamət günü təyyarəsi” deyilir.

1980-ci illərdə hazırlanan Rusiyanın “İl-96” təyyarəsinin xüsusi versiyası olan bu hava gəmisi yalnız dövlət başçısının daşınması üçün nəzərdə tutulmayıb. O, böyük böhran və fövqəladə hallar zamanı havadan idarəetmə mərkəzi kimi fəaliyyət göstərə biləcək şəkildə hazırlanıb.

Dörd ədəd PS-90A mühərriki ilə təchiz olunan təyyarənin uçuş məsafəsinin təxminən 11 min kilometr olduğu bildirilir. Bu imkan uzun məsafəli uçuşların tez-tez yanacaq doldurmadan həyata keçirilməsinə şərait yaradır.

Təyyarənin uzunluğu 55,35 metr, qanadlarının açıqlığı isə 60,12 metrdir. “İl-96-300PU” Rusiya dövlət başçısını və digər yüksək vəzifəli şəxsləri daşıyan xüsusi dövlət aviasiya bölməsi tərəfindən istismar olunur.

Prezident təyyarəsini adi VIP təyyarələrdən fərqləndirən əsas xüsusiyyətlərdən biri böhran zamanı mobil komanda mərkəzi kimi fəaliyyət göstərə bilməsidir. Məlumata görə, təyyarədə Rusiyanın hərbi, təhlükəsizlik və dövlət qurumları ilə dünyanın müxtəlif nöqtələrindən təhlükəsiz əlaqə yaratmağa imkan verən şifrəli rabitə sistemləri mövcuddur.

Bundan başqa, təyyarənin peyk rabitəsi, elektron əks-tədbir sistemləri və müxtəlif müdafiə texnologiyaları ilə təchiz edildiyi bildirilir. Bu sistemlərin əsas məqsədi fövqəladə vəziyyətlər zamanı Kreml ilə Rusiyanın mühüm dövlət qurumları arasında əlaqənin kəsilməsinin qarşısını almaqdır.

Təyyarənin yalnız təhlükəsizlik və rabitə sistemləri ilə deyil, dəbdəbəli interyeri ilə də diqqət çəkdiyi bildirilir. “İl-96-300PU”nun daxilində Putin üçün xüsusi prezident suiti, yataq otaqları və hamamlar, həmçinin mətbəx və yemək sahəsi yerləşir.

Bundan əlavə, rəsmi görüşlər və nümayəndə heyətinin toplantıları üçün geniş iclas salonunun olduğu qeyd edilir. Təyyarənin interyerində qızılı dekorativ elementlərdən, yüksək keyfiyyətli ağac işləmələrindən və dəri oturacaqlardan istifadə edildiyi bildirilir.скачать dle 11.3