Azərbaycanda ali təhsil müəssisələrinin birləşdirilməsi ilə bağlı müxtəlif iddialar səsləndirilir. Sosial şəbəkələrdə bu istiqamətdə yayılan məlumatlar universitetlərin gələcək fəaliyyəti ilə bağlı müzakirələri də gündəmə gətirib. Bəs yaxın müddətdə ölkədə universitetlərin birləşdirilməsi gözlənilirmi?

Məsələ ilə bağlı Median.Az-a açıqlama verən Sosial Tədqiqatlar Mərkəzinin əməkdaşı, təhsil tədqiqatçısı Elmin Nuri bildirib ki, hazırkı vəziyyətdə belə bir prosesin qısa müddətdə baş verəcəyini düşünmür:

“Xüsusilə sosial şəbəkələrdə bu mövzuda müxtəlif məlumatlar oxunsa da, universitetlərin birləşdirilməsi ilə bağlı yaxın vaxtlarda konkret bir addım atılacağını şəxsən gözləmirəm. Təbii ki, bu, mənim subyektiv fikrim və şəxsi yanaşmamdır. Bunun əsas səbəblərindən biri ölkədə ali təhsilə tələbatın ildən-ilə artmasıdır. Qəbul imtahanlarında iştirak etmək üçün qeydiyyatdan keçən abituriyentlərin sayı yüksəlir, eyni zamanda universitetlər üzrə dövlət sifarişi əsasında ayrılan plan yerlərinin də artırılması istiqamətində addımlar atılır. Birincisi, ölkədə tələbə sayı ildən-ilə artır. Qəbul imtahanlarına qeydiyyatdan keçən abituriyentlərin sayı hər il yüksəlir”.

O qeyd edib ki, universitetlərə olan tələbat və ali təhsil müəssisələrində dövlət sifarişli plan yerlərinin sayı da ildən-ilə artır:
“Hətta bu il həmin plan yerlərinin daha da artırılması gözlənilir. Bununla yanaşı, əlavə universitetlərin yaradılması istiqamətində də işlər aparılır. Bu ali təhsil müəssisələri ya filial formasında, ya xarici universitetlərlə ikili diplom proqramları çərçivəsində, ya da birbaşa xarici universitetlərin filialları kimi fəaliyyət göstərir. Türkiyə, İtaliya və digər ölkələrlə birgə yaradılan universitetlərin sayının artacağı da gözlənilir. Ali təhsil sistemində bu cür genişlənmənin müşahidə olunduğu bir vaxtda universitetlərin kütləvi şəkildə birləşdirilməsi real görünmür”.

Ayselскачать dle 11.3