Müasir dünyanın inkişaf etməsində universitetlərin rolunun daha çox olduğunu desək yanılmarıq. Bəzən elə universitetlər olur ki, müasir standartlara bir o qədər də cavab vermir. Hazırda Azərbaycanda da bu tipli universitetlər və akademiyalar fəaliyyət göstərməkdədir.
Haqqında söz açacağımız ali təhsil müəssisəsi Bakının Binəqədi rayonu, Azadlıq prospekti 181 ünvanında yerləşən Azərbaycan Əmək və Sosial Münasibətlər Akademiyasıdır. Sözügedən akademiyanın aşağı mərtəbələrində tələbələrə müxtəlif ixtisaslar üzrə fənlər tədris olunur. Yuxarı mərtəbələr isə, yaşayış binası kimi fəaliyyət göstərir. Bəs görəsən ali təhsil müəssisəsinin bu cür şəraitdə fəaliyyət göstərməsi standartlara nə dərəcədə uyğundur?
Məsələ ilə bağlı təhsil eksperti Etibar Əliyev modern.az-a bunları söyləyib:
"Bu akademiyanın adı heç bir yerdə çəkilmir. Hesab edirəm ki, akademiyanın adının özündə bir absurdluq var. Bura tələbələr ən aşağı balla qəbul olurlar. Hətta burada təkrar ixtisaslar mövcuddur. Digər tərəfdən, akademiyanın maddi-texniki bazası olduqca zəifdir. Azərbaycan Əmək və Sosial Münasibətlər Akademiyası ölkə üçün elə də önəmli hesab olunmur. Bu cür akademiya, bağlanan özəl universitelər səviyyəsində mütəxəssislər hazırlayır. Mən şəxsən belə universitetlərin fəaliyyətini müsbət qiymətləndirmirəm. Biz hər bir universiteləri təhlil etdiyimiz zaman, ilk öncə onun uğurlarına da diqqət edirik. Nəticədə məlum oldu ki, bu akademiyanın heç bir uğuru yoxdur. Düşünürəm ki, vahid idarəçilik sisteminin bərqərar olunması üçün, universitetlərin hər biri Təhsil Nazirliyinə tabe olsa, daha məqsədəuyğun olar”.
Modern.az-ın əməkdaşı Azərbaycan Əmək və Sosial Münasibətlər Akademiyası ilə əlaqə saxlayıb. Akademiyadan verilən məlumata görə, binanın yuxarı mərtəbələri tələbə yataqxanasıdır. Ancaq burada məcburi köçkünlər məskunlaşıb.
Şahidi olduğunuz hadisələri çəkib bizə göndərin!
Son Əlavə