Yol hərəkətində məsuliyyət yalnız sükan arxasında olan şəxslərin üzərinə düşmür. Piyadaların da yol hərəkəti qaydalarına əməl etməməsi bəzən ciddi qəzalara səbəb olur. Avropanın bir sıra ölkələrində piyadaların qayda pozuntularına görə tətbiq edilən cərimələrin məbləği kifayət qədər yüksəkdir.

Bəs Azərbaycanda qaydaları pozan piyadaları hansı cəza gözləyir?

Mövzu ilə bağlı Median.Az-a danışan vəkil Əkrəm Həsənov bildirib ki, Azərbaycan qanunvericiliyində də piyadaların yol hərəkəti qaydalarını pozmasına görə inzibati məsuliyyət müəyyənləşdirilib:

“Piyada yolu bunun üçün nəzərdə tutulmayan hissədən keçərsə, svetoforun qadağanedici siqnalına məhəl qoymazsa və ya nəqliyyat vasitələrinin hərəkətinə maneə yaradarsa, inzibati məsuliyyət daşıya bilər. Qanunvericiliyə əsasən, bu cür hallarda piyadalar üçün, bir qayda olaraq, 20 manat məbləğində cərimə nəzərdə tutulur. Qayda pozuntusunun nəticəsində yol-nəqliyyat hadisəsi baş verərsə və ya sürücülər üçün təhlükəli vəziyyət yaranarsa, məsuliyyətin xarakteri də dəyişə bilər. Burada əsas məqsəd insanları cəzalandırmaqdan daha çox, təhlükəli davranışların qarşısını almaqdır. Lakin praktiki baxımdan bəzi piyadalar cərimənin məbləğini ciddi hesab etmədiyindən yol hərəkəti qaydalarına lazımi səviyyədə əməl etmirlər”.

Vəkil qeyd edib ki, xüsusilə nəqliyyatın intensiv olduğu yollarda piyadaların qəfil şəkildə yolu keçməsi təhlükəli nəticələrə gətirib çıxara bilər:

“Piyadaların təhlükəsizliyinin təmin olunması üçün yalnız cərimə mexanizminin sərtləşdirilməsi kifayət etmir. Piyada keçidlərinin daha əlçatan və düzgün yerlərdə təşkil olunması, nəzarət imkanlarının genişləndirilməsi, eləcə də uşaqlar arasında yol hərəkəti qaydaları ilə bağlı maarifləndirmənin artırılması mühüm əhəmiyyət daşıyır. Bir sıra Avropa ölkələrində yüksək cərimələr və effektiv nəzarət insanların yol davranışına təsir göstərir. Azərbaycanda da mövcud hüquqi mexanizmlərin ardıcıl tətbiqi ilə yanaşı, yol mədəniyyətinin formalaşdırılmasına xüsusi diqqət yetirilməlidir”.

Aysel Elnurскачать dle 11.3