Az yatmağın daha bir zərəri üzə çıxdı

Qəbizliyi hər zaman yalnız suyun azlığı və ya qida rasionu ilə izah etmək mümkün deyil. Qastroenteroloqlar Stefani Makəbi və Ceremi Polman bağırsaq fəaliyyətinə mənfi təsir edən gizli amilləri açıqlayıblar.

Həkimlərin fikrincə, yuxu rejimi bu məsələdə mühüm rol oynayır. Yoğun bağırsaq 24 saatlıq sirkad ritmi ilə işləyir. Adətən, səhər saatlarında aktiv olan bağırsaq fəaliyyəti gecələr yavaşlayır. Yuxu çatışmazlığı bu dövriyyəni pozaraq qəbizlik ehtimalını artırır.

Bundan başqa, bağırsaqların fəaliyyətinə aşağıdakı amillər də təsir edir:

Dərman preparatları: Antihistamin (allergiya əleyhinə) dərmanlar, kalsium və ya dəmir əlavələrinin qəbulu.
Psixoloji vəziyyət: Yüksək həyəcan və təşviş bağırsaq-beyin əlaqəsini pozaraq həzm prosesini dəyişir.
Vərdişlər: Təbii ehtiyacı uzun müddət təxirə salmaq bağırsaq möhtəviyyatının bərkiməsinə səbəb olur.

Mütəxəssislər profilaktika üçün gündə azı yeddi saat yatmağı, fiziki aktivliyi artırmağı və kifayət qədər lifli qidalar qəbul etməyi tövsiyə edirlər. Həmçinin, qəbizliyin ishalla növbələşməsi halında həkimə müraciət etmək vacibdir, çünki bu, bəzən bağırsaqda yaranan şişlərin əlaməti ola bilər.//demokrat.az