Bu gün onlayn mərc və qumar platformalarının sosial şəbəkələr və müxtəlif media kanalları vasitəsilə geniş şəkildə reklam olunması gənclər arasında ciddi narahatlıq doğurur. Asan pul qazanmaq vədi bir çox gənci bu platformalara cəlb edir və bu da həm maddi, həm də psixoloji riskləri artırır. Belə şəraitdə maarifləndirmə və dövlət nəzarətinin rolu xüsusi əhəmiyyət daşıyır. Bəs bu reklamların məhdudlaşdırılması üçün hansı qanuni addımlar atılmalıdır? Təhsil sistemində gənclərin maliyyə savadlılığını artırmaq üçün hansı proqramlar tətbiq oluna bilər? Və ən əsası, sosial media platformaları bu risklərin qarşısının alınmasında hansı məsuliyyəti daşımalıdır?

Mövzu ilə bağlı Median.Az-a açıqlama verən Ağ Partiyanın sədri Tural Abbaslı bildirib ki, bu məsələlərə ayrı-ayrılıqda yanaşmaq düzgün deyil.
Onun sözlərinə görə, qumar, alkoqol istifadəsi və qeyri-sağlam həyat tərzi bir-biri ilə əlaqəli problemlərdir və onların hər biri üzrə ayrıca dövlət proqramlarının hazırlanması uzun zaman tələb edə bilər.
T.Abbaslı qeyd edib ki, son dövrlər gənclər arasında cinayətkar aləmə meyilliliyin artması, orta məktəblərdə zorakılıq hallarının çoxalması və yeniyetmələrin bir-birinə qarşı aqressiv davranışları eyni sosial problemlərin nəticəsidir:

“Bunları yalnız qumarla əlaqələndirmək düzgün olmaz. Çünki qumar sahəsində dövlətin özü tərəfindən fəaliyyət göstərən “Misli”, “Topaz” kimi platformalar mövcuddur, lotereyalar açıq şəkildə satılır, müxtəlif idman oyunlarına mərc imkanları yaradılır. Burada da kifayət qədər gənc asan qazanc əldə etmək ümidi ilə vəsaitlərini itirir və nəticədə neqativ hallarla üzləşirlər”.

Partiya sədri hesab edir ki, dövlətin gənclərlə bağlı vahid ideoloji xətti formalaşdırılmalıdır:

“Bu ideoloji yanaşma uşaqlara bağça və məktəb yaşlarından aşılanmalıdır. Sovet dövründə kommunist və komsomol, eyni zamanda SSRİ vətəndaşı obrazı vardı. Lakin bu gün Azərbaycan vətəndaşının hansı dəyərlərə söykəndiyi aydın şəkildə müəyyənləşdirilməyib. Bu vətəndaş liberaldırmı, mühafizəkardırmı, milli-mənəvi dəyərlərə bağlıdırmı, yoxsa kosmopolit düşüncəyə sahibdir?”

Tural Abbaslı vurğulayıb ki, cəmiyyət milli-mənəvi dəyərlərə bağlı qalmalı, milli adət-ənənələr və dini dəyərlər gənc nəslə daha fəal şəkildə təbliğ edilməlidir:

“Əgər uşaqlara bağçadan və məktəbdən qumarın, oğurluğun, zorakılığın və cinayətin həm hüquqi, həm də mənəvi baxımdan yanlış olduğu öyrədilərsə, sonradan əlavə nəzarət mexanizmlərinə ehtiyac azalacaq. Bu gün gənclərin tərbiyəsində məktəblər və universitetlər əvvəlki qədər təsirli rol oynamır. Gənclərə tərbiyəni əsasən qlobal rəqəmsal platformalar və beynəlxalq sosial şəbəkələr verir. Burada isə daha çox maliyyə gücü olan tərəflərin ideologiyası təbliğ olunur. Buna görə də biz köklərimizə qayıtmalı, milli adət-ənənələrimizi və dəyərlərimizi gənclər arasında daha geniş şəkildə təbliğ etməliyik”, – deyə AĞ Partiya sədri bildirib.скачать dle 11.3