Sığınacaqda depressiyaya düşən qız fərdi təhsilə cəlb ediləcək.

Bu barədə Azərbaycan Uşaqlar Birliyinin rəhbəri Kəmalə Ağazadə məlumat verib.

"Məlumat üçün bildirirəm ki, iş saatı başlayan kimi mənə Bakı Şəhəri üzrə Təhsil İdarəsinin əməkdaşı Bəşarət müəllim zəng edərək bildirdi ki, müraciətinizlə bağlı artıq qərar və tapşırıq 314 saylı tam orta məktəbin direktoru Səfa müəllimə verildi. Üç uşaq 1 dekabr 2025-ci il tarixindən müvafiq cədvələ uyğun olaraq fərdi təhsilə gedəcək.

Gedirəm təzə məktəb paltarı almağa", - paylaşımda bildirilib.

* * * * *

"Sığınacaqda qalan gənc fərdi təhsilə cəlb edilmədiyi üçün depressiv vəziyyətə düşüb, paltarlarını doğrayıb".

Bu barədə Azərbaycan Uşaqlar Birliyinin rəhbəri Kəmalə Ağazadə sosial şəbəkə hesabında paylaşım edib.

"14 noyabrda sosial şəbəkədə status paylaşmışdım fərdi təhsilə getməli olan üç sakinimizlə bağlı. 17 noyabrda qaçaqaçla dedilər ki, bazar ertəsindən artıq gedəcəklər. Hər gün paltarını axşamdan hazırlayıb bizdən cavab gözləyirdi. Cavab isə "hələ gözləyək" idi.

Alın indi cavabınızı! 16 yaşlı, üçüncü sinfə fərdi təhsilə gedəcək qızımız daha getməyəcək.

Depressiv vəziyyətdədir artıq. Kəsib doğrayıb paltarlarını", - paylaşımda bildirilib.

Mövzu ilə bağlı Məktəbəqədər və Ümumi Təhsil üzrə Dövlət Agentliyinə sorğu göndərilib.


скачать dle 11.3