Niderlandda NATO-nun nüvə təlimləri başlayır

Niderlandda oktyabrın 13-də nüvə çəkindirməsinin məşqi üçün NATO-nun illik "Steadfast Noon" təlimləri başlayacaq.

Bu barədə "Die Welt" nəşri məlumat yayıb.

Qeyd olunub ki, təlimlərdə təxminən 2 min hərbçi, həmçinin Belçika, Böyük Britaniya və Danimarka da daxil olmaqla 14 ölkədən 70-dən çox təyyarə iştirak edəcək. Bu il manevrlər, xüsusilə, Şimal dənizi üzərindəki hava məkanında keçiriləcək.

NATO təlimlərin dəqiq ssenari və detallarını açıqlamır. Hərbi ekspertlərin fikrincə, mütəmadi olaraq oktyabrda keçirilən təlimlərdə nüvə silahlarının yeraltı anbarlardan təyyarələrə təhlükəsiz daşınması və qırıcı təyyarələrə quraşdırılması məşq edilir. Lakin bununla belə, yalnız əsl nüvə başlığı olmayan təlim bombaları istifadə olunur.