65 yaşdan çox olmaqla müqaviləsinin müddəti uzadılmış həkimlərin sayı açıqlanıb

Azərbaycanda 65 yaşdan çox olmaqla müqaviləsinin müddəti uzadılmış həkimlərin sayı TƏBİB tabeli tibb müəssisələrində çalışan həkimlərin ümumi sayında 12 faiz təşkil edir.

Median.Az xəbər verir ki, bu, Nazirlər Kabinetinin 2023-cü il üzrə fəaliyyəti haqqında hesabatında əks olunub.

Qeyd edilib ki, Əmək Məcəlləsinin 10-1-ci maddəsinin 3-cü hissəsinə əsasən, elm, mədəniyyət, səhiyyə və təhsil sahələrinin inkişafında müvafiq icra hakimiyyəti orqanı tərəfindən müəyyən edilmiş xüsusi xidmətləri olmuş dövlət büdcəsindən maliyyələşən müəssisənin 65 yaşına çatmış işçisinin çalışma müddətinin müvafiq dövlət orqanı tərəfindən 5 ildən çox uzadılması mümkündür.

İcbari Tibbi Sığorta üzrə Dövlət Agentliyi tərəfindən regionda kadr çatışmazlığının aradan qaldırılması, xaricdə təhsil almış həkimlərin dövlət tibb müəssisələrinə cəlb olunması məqsədilə xüsusi proqram icra olunur. Bütün bunlarla yanaşı, pensiya yaşına çatmış həkimlərə xüsusi yanaşma tətbiq olunur. Belə ki, hər bir hal üzrə müvafiq xəstəxanada kadr çatışmazlığı, həkimin peşə bacarıqları və təcrübəsi nəzərə alınmaqla müqavilələr uzadılır, yaxud ixtisas üzrə ehtiyac olan digər xəstəxanalara yönəldilir. Nəzərə çatdırılıb ki, 65 yaşdan çox olmaqla müqaviləsinin müddəti uzadılmış həkimlərin sayı TƏBİB tabeli tibb müəssisələrində çalışan həkimlərin ümumi sayında 12 faiz təşkil edir.//apa.az