Bakı Ağır Cinayətlər Məhkəməsində Siyəzən rayon sakini Rauf Şirinovun (1974-cü il təv.) CM-nin 120.2.4 (xüsusi amansızlıqla qəsdən adam öldürmə) və 134-cü (öldürməklə və ya sağlamlığa ağır zərər vurmaqla hədələmə) maddəsi ilə təqsirləndirilməsinə dair cinayət işi üzrə məhkəmə prosesi başa çatıb.
Median.Az xəbər verir ki, qətl bu il iyunun 14-nə keçən gecə saat 1 radələrində Bakıxanov qəsəbəsi, Bəşir Bünyadov küçəsi, 312 saylı binanın qarşısında törədilib. Aralarında davam edən ədavət nəticəsində Rauf Şirinov "Vinçester" markalı ov tüfəngindən atəşlər açaraq yeznəsi Şərur rayon sakini Ramiz Məmmədovu (1972-ci il təv.) güllələyib və hadisə yerində keçinib. Zərərçəkmiş 3 saylı şəhər klinik xəstəxanasına çatdırılsa da, orada ölüb.
Daxil olan məlumat əsasında hadisə yerinə Sabunçu RPİ və rayon prokurorluğunun əməkdaşları cəlb olunub, Rauf Şirinovun tutulması istiqamətində
əməliyyat-axtarış tədbirləri başlanılıb. İyunun 17-də "Hozu" ləqəbli ilə tanınan Rauf Şirinov Sabunçu RPİ 12-ci polis şöbəsinin əməkdaşları tərəfindən saxlanılıb.
Məlumata əsasən, qohumlar birgə sahibkarlıq fəaliyyəti ilə məşğul olub. Biznesi Şirinov idarə etsə də, Bakıda fəaliyyət göstərən 84 və 113 №i avtobusların marşrut xətləri mərhum Məmmədova məxsus olub.
Məhkəmənin hökmü ilə təqsirləndirilən şəxs 13 il müddətinə azadlıqdan məhrumetmə cəzasına məhkum olunub.