Artıq çəkili insanları təhqir edən aparıcı efirdən uzaqlaşdırıldı - Misirdə

Misirdə teleaparıcı kök insanlar haqqında işlətdiyi ifadələrə görə efirdən uzaqlaşdırılıb.

Bu barədə "Gulf News" xəbər yayıb.

Belə ki, aparıcı Riham Said kök insanları həm ailələri, həm də dövlət üçün artıq yük adlandırıb.

Said gənc qızlar haqqında olan verilişinin epizodlarından birini artıq çəkili insanlara həsr edib.

Tamaşaçılara müraciət edən aparıcı onlara səslənib: "Kök olanda həm pis görünürsüz, həm də gəzə bilmirsiniz. Üstəlik, artıq çəkili qızların evlənmək şansı da olmur".

Bu ifadələrdən sonra ciddi tənqid və təzyiqlə üzləşən aparıcı haqqında məhkəmə işi başlayıb.

Onun çalışdığı "Əl Hayat TV" isə məhkəmə qərarına qədər aparıcını işdən uzaqlaşdırmağı qərara alıb.

Riham Said məsələ ilə bağlı açıqlama verərək, əslində heç kimi incitmək istəmədiyini, sadəcə piylənmənin zərərləri haqqında danışmaq məqsədi ilə bu sözləri işlətdiyini bildirib.

Əleyhinə "Facebook" sosial şəbəkəsində geniş kampaniya başladılan aparıcı açıq şəkildə üzr istəyib və bir müddət ailəsi ilə məşğul olmaq üçün işindən ayrılacağını bildirib.