Şamaxı sakini pay torpaq sahəsinin zəbt olunduğunu iddia edib

“Bizim Yol”a müraciət edən Şamaxı rayon Qızmeydan kənd sakini Quliyeva Nargilə Ağababa qızı pay torpaq sahəsinin əlindən alındığından şikayətçidi.

“Mən sovxoz dövründə uzun müddət işləmişəm. 1999-ci ildə torpaq bölgüsünə uyğun olaraq bizim ailə üzvlərinə də qanuni akt əsasında pay torpaq sahəsi verildi. Həmin dövrdən etibarən verilən torpaq sahəsindən səmərəli istifade etmişəm. Arpa, buğda əkmişəm. 2003-cü ildə həyat yoldaşım rəhmətə getdikdən sonra kəndin bələdiyyə sədri İrşad Zərbəliyev və Şamaxı rayon Torpaq və Xəritəçəkmə Komitəsinin sabiq müdiri Mehman Əfəndiyev vəzifə səlahiyyətlərindən sui-istifade edib əlbir olaraq qanuni əsaslarla bizə məxsus olan pay torpaq səhəsinin 2.5 hektarını Qızmeydan kənd Bələdiyyəsi İnkişaf Fondunun balansına keçirdilər”,-deyə N.Quliyeva bildirib.

Onun sözlərinə görə, o, Şamaxı rayon İcra Hakimiyyətinə etdiyi müraciətlər nəticəsiz qalıb: “Hətta yerli icra hakimiyyətinin məsul şəxsin kabinetindən qovulmuşam. 10 ildən artıq mənim yeganə dolanışıq mənbəyim olan əkin sahəsini qeyri-qanuni zəbt ediblər. Məhkəməyə şikayət etdim. Şikayətimə baxılmadı, üstəlik mən məhkəmədə 2000 manat məbləğində cərimə olundum”.//bizimyol.info