Məşhur yunanıstanlı müğənni Yorqos Mazonakis Afinada yerləşən özəl klinikalardan birində ürəktutması nəticəsində 54 yaşında dünyasını dəyişib.

Median.Az Yunanıstan mətbuatına istinadən xəbər verir ki, sənətçi kök hüceyrə terapiyası almaq məqsədilə tibb müəssisəsinə gedib.

Onun ürəyi venadaxili kateterin tətbiqindən sonra fəaliyyətini dayandırıb.

Hadisədən bir neçə dəqiqə sonra ifaçı təcili tibbi yardım maşını ilə başqa xəstəxanaya aparılıb. Reanimasiya şöbəsində aparılan süni tənəffüs və digər tibbi müdaxilələrə baxmayaraq, həkimlər onu həyata qaytara bilməyiblər və ölüm faktını qeydə alıblar.

Qeyd edək ki, 1972-ci ildə Pirey bölgəsinin Nikeya qəsəbəsində doğulan Mazonakis, 1990-cı illərin başlanğıcında müxtəlif klublarda səhnəyə çıxıb. O, Yunanıstanın musiqi sahəsinə 20 yaşında daxil olub.

Sənətçinin yaradıcılıq yolu indiki "Universal Music", o dövrdə isə "PolyGram" adlanan şirkətlə müqavilə bağladıqdan sonra inkişaf etməyə başlayıb. Məhz bu şirkət 1993-cü ildə onun ilk albomunu çıxarıb.

İfaçının musiqi tərzi Stratos Dionisiu, Yannis Parios, Marinella və Xaris Aleksiu kimi korifey yunan sənətkarlarının təsirini müasir pop ritmləri ilə ahəngdar şəkildə birləşdirirdi. Özünəməxsus səhnə performansı onu yerli pop musiqisinin aparıcı simalarından birinə çevirmişdi.

Öz dövrünün ən sevilən ifaçılarından sayılan Mazonakis böyük izləyici kütləsinə malik idi.
//oxu.azскачать dle 11.3