Bu qayda pozuntuları sürücülərə baha başa gəlir - Açıqlama

Yollarda baş verən qəzaların və nəqliyyat sıxlığının əsas səbəblərindən biri sürücülərin yol hərəkəti qaydalarına əməl etməməsidir. Müxtəlif pozuntulara görə tətbiq edilən inzibati cərimələrə baxmayaraq, bəzi qayda pozuntuları gündəlik hərəkətdə daha çox müşahidə olunur. Ara məsafəsinin düzgün saxlanılmaması, dayanma və durma qaydalarının pozulması, piyadalara yol verilməməsi və avtobus zolaqlarından qanunsuz istifadə bu hallar sırasındadır.

Məsələ ilə bağlı nəqliyyat eksperti Aslan Əsədov Median.Az-a bildirib ki, ara məsafəsinin düzgün seçilməməsi yol hərəkətində ən çox rast gəlinən qayda pozuntularından biridir:

“Bu hal xüsusilə sıx nəqliyyat şəraitində daha qabarıq şəkildə özünü göstərir və qəza riskini əhəmiyyətli dərəcədə artırır. Sürücülər bəzən yol və hava şəraitini nəzərə almadan, qarşıdakı nəqliyyat vasitəsi ilə kifayət qədər məsafə saxlamırlar ki, bu da qəfil dayanma və toqquşmalara səbəb ola bilir. Bununla yanaşı, yol hərəkətində “anlaşma prinsipi”nin pozulması da geniş yayılmış hallardandır. Xüsusilə dairəvi hərəkət sahələrində sürücülər arasında növbəlilik qaydasının gözlənilməməsi, üstünlük hüququnun nəzərə alınmaması və yol vəziyyətinin düzgün qiymətləndirilməməsi kimi hallar tez-tez qayda pozuntularına səbəb olur. Ən çox rast gəlinən pozuntular sırasında dayanma və durma qaydalarının pozulması da xüsusi yer tutur. Sürücülərin qadağan olunmuş yerlərdə dayanması və ya uzun müddət nəqliyyatın hərəkətinə mane olacaq şəkildə durması həm sıxlıq yaradır, həm də yolun buraxılış qabiliyyətini azaldır”.

Ekspertin sözlərinə görə, piyadalara üstünlük verilməməsi də yol hərəkətində ciddi problemlər yaradan pozuntular sırasındadır:

“Piyada keçidlərində sürücülərin üstünlük qaydasına əməl etməməsi həm piyadaların təhlükəsizliyini ciddi şəkildə risk altına alır, həm də ən çox cərimələnən inzibati xətalar sırasında yer alır. Son illərdə diqqət çəkən digər bir məsələ isə avtobus zolağına daxil olma hallarının artmasıdır. Bu qayda pozuntusu ictimai nəqliyyatın hərəkətinə mane olur, avtobusların qrafikini pozur və yol hərəkəti intizamına mənfi təsir göstərir. Bu tip pozuntular həm yol polisi tərəfindən, həm də müşahidə kameraları vasitəsilə qeydə alınır və inzibati cərimələrlə nəticələnir. Ümumilikdə, sadalanan qayda pozuntuları yol təhlükəsizliyi baxımından ciddi risk yaradır və ən çox rast gəlinən inzibati xətalar sırasında yer alır”.

Aysel