İsmayıllıda kənd məktəbləri bağlandı: Şagirdlərin aqibəti necə olacaq? - Video

İsmayıllıda bəzi kənd məktəbləri fəaliyyətini dayandırıb. Bu isə valideynlərin narahatlığına səbəb olub.

Median.Az "Xəzər" TV-yə istinadən xəbər verir ki, Namazgah kəndinin sakinlərinin sözlərinə görə, məktəblərin bağlanması şagirdlərin təhsil almaq üçün uzun məsafə qət etməsinə səbəb olur.

İbtidai sinif şagirdləri də daxil olmaqla, uşaqlar 5-10, hətta 15-20 kilometr uzaqda yerləşən məktəblərə getməli olurlar.

Sakinlər bildirirlər ki, bu vəziyyət xüsusilə qış aylarında ciddi çətinlik yaradır. Qar, çovğun və yolların keçilməz olması səbəbindən uşaqların məktəbə gedib-gəlməsi çətinləşir. Bəzi valideynlər isə övladlarının təhsilini davam etdirməsi üçün kəndi tərk etmək məcburiyyətində qalırlar.

Şagirdlər də məktəblərin bağlanmasının onlar üçün çətinlik yaratdığını deyirlər.

Problemin yalnız Namazgah kəndi ilə məhdudlaşmadığı bildirilir. Digər kəndlərin sakinləri də oxşar çətinliklərlə üzləşdiklərini söyləyirlər.