Son illər Bakıda daşınmaz əmlak bazarında müşahidə olunan qiymət artımı mənzil alışına marağı daha da artırıb. Artıq alıcıların əksəriyyəti evi yalnız yaşayış məqsədilə deyil, həm də gələcəkdə qazanc əldə etmək üçün investisiya vasitəsi kimi dəyərləndirir. Yeni metro stansiyalarının tikintisi, nəqliyyat infrastrukturunun genişləndirilməsi, urbanizasiya prosesləri və paytaxtın müxtəlif ərazilərində həyata keçirilən yenidənqurma layihələri bəzi yaşayış məntəqələrini investorlar üçün daha cəlbedici edir. Bəs hazırda Bakının hansı ərazilərində mənzil almaq investisiya baxımından daha sərfəlidir?

İnşaat və şəhərsalma məsələləri üzrə ekspert Muxtar Ərturan Median.Az-a bildirib ki, Bakıda investisiya məqsədilə mənzil alarkən ən vacib meyar gələcəkdə həmin əmlakın dəyərinin artması və kirayə potensialının yüksək olmasıdır:

“Bu baxımdan şəhərin mərkəzi hissəsində yerləşən, dənizə və şəhər panoramasına açılan mənzillər daha üstün hesab olunur. Xüsusilə Sahil və ətraf ərazilər, Ağ Şəhər, Dənizkənarı Bulvara yaxın lokasiyalar, həmçinin yüksək mərtəbələrdən Xəzər dənizinə panoramik mənzərəsi olan layihələr uzunmüddətli perspektivdə daha çox dəyər qazanır. Bununla yanaşı, nəqliyyat əlçatanlığı, inkişaf etmiş infrastruktur, premium yaşayış kompleksləri və həmin ərazilərdə yeni biznes və turizm layihələrinin həyata keçirilməsi də mənzilin investisiya cəlbediciliyini artıran əsas amillərdir”.
O deyib ki, belə mənzillərə həm yerli, həm də xarici alıcılar tərəfindən tələbat yüksək olduğundan onların satış və kirayə bazarında likvidliyi də daha yüksək olur:

“Ona görə də investisiya baxımından seçim edilərkən ilk növbədə şəhərin mərkəzində yerləşən, dəniz mənzərəli və panoramik görünüşə malik, gələcək inkişaf potensialı yüksək olan ərazilərə üstünlük verilməsi daha məqsədəuyğun hesab olunur. Bu tip daşınmaz əmlak həm kapital artımı, həm də sabit kirayə gəliri baxımından daha sərfəli investisiya sayılır”.

Aysel Elnurскачать dle 11.3