Rusiya Xarkov-Poltava yolundakı bütün yanacaqdoldurma məntəqələrini məhv edib

Rusiya silahlı qüvvələri Kiyev avtomagistralının Xarkov və Poltava şəhərləri arasındakı hissəsində yerləşən bütün yanacaqdoldurma məntəqələrini (YDM) sıradan çıxarıblar.

Median.Az-ın 2day.kh.ua saytına istinadən yaydığı xəbərə əsasən, bu barədə məlumatı Xarkov vilayət şurasının deputatı Aleksandr Skorik təqdim edib.

Onun sözlərinə görə, iyulun 26-na keçən gecə Rusiya ordusu sözügedən yolda eyni vaxtda üç YDM-ə hücum edib. Zərbələr Valkı, Şarovski və Qontov Yar ərazilərində qeydə alınıb. Ümumilikdə isə Xarkov vilayəti ərazisində 80-dən artıq yanacaqdoldurma stansiyası dağıdılıb.

"Hazırda Xarkov-Kiyev avtomobil yolunun Xarkovdan Poltavaya qədər olan hissəsindəki bütün stansiyalar tamamilə məhv edilib. Buraya Valkı qəsəbəsi, Çutovo şəhəri və Poltava istiqamətindəki digər məntəqələr daxildir", - deyə A. Skorik qeyd edib.

Deputat həmin istiqamətdə hərəkət etmək istəyən sürücülərə müraciət edərək, əvvəlcədən kifayət qədər yanacaq tədarükü görməyi tövsiyə edib. O vurğulayıb ki, adıçəkilən yolda avtomobilə yanacaq vurmaq üçün demək olar ki, heç bir imkan mövcud deyil.

Bununla belə, Xarkov vilayətinin özündə hər hansı yanacaq böhranı müşahidə olunmur.