Şəki Ağır Cinayətlər Məhkəməsində həmkəndlisini döyməkdə təqsirləndirilən Bünyad Məmmədovun cinayət işi üzrə məhkəmə prosesi başa çatıb.

Median.Az Oxu.az-a istinadən xəbər verir ki, prosesdə təqsirləndirilən şəxsə hökm oxunub. Məhkəmənin hökmü ilə B.Məmmədov 3 il azadlıqdan məhrum edilib. O, məhkəmə zalında həbs olunub.

İttihama görə, hadisə Şəki rayonunun Kişik Dəhnə kəndində baş verib. Əslən eyni kənddən olan Rusiya vətəndaşları Bünyad Məmmədov və Elşən Məmməhəsənov uzun müddət Rusiyada alverlə məşğul olublar. Elşən tanışlarından nisyə mallar götürərək satmaq üçün Bünyada verib. Bir müddətdən sonra Bünyad Elşənin tanışlarından satmaq üçün mal götürüb və sonradan həmin malların pullarını qaytarmayıb. Həmin pulu Elşən ödəyib və Bünyadın ona ümumilikdə 41 min manat borcu yaranıb.

Bir müddətdən sonra Elşən Azərbaycana qayıdaraq Şəkidə işləməyə başlasa da, Bünyad ona borcunu qaytarmayıb. Ötən il isə Bünyad Rusiyadan Azərbaycana - yaşadığı Kiçik Dəhnə kəndinə qayıdıb. Bir müddətdən sonra Elşən Bünyadla kənd ərazisindəki çayxanada rastlaşıb və ondan pulunu istəyib. Bünyad isə Elşənə borcunun olmadığını iddia edib və tərəflər arasında mübahisə yaranıb. Mübahisə zamanı Bünyad Elşənin baş və bədən nahiyəsinə zərbələr endirərək ona ağır xəsarətlər yetirib. Elşən xəstəxanaya yerləşdirilib.

Faktla bağlı cinayət işi başlanılıb. Polis əməkdaşlarının keçirdikləri tədbirlərlə Bünyad Məmmədov saxlanılaraq istintaqa təhvil verilib.скачать dle 11.3