Çinli fizik və mühəndis Da Bonun Yaponiyada və Tayvanda aparıcı tədqiqat mərkəzlərində illərlə işləyərək əldə etdiyi bilikləri Çin üçün genişmiqyaslı yarımkeçirici layihəsinə yönəltdiyi bildirilir.

Bu barədə "PiataAuto” yazıb.

Məlumata görə, Da Bo Çin Elm və Texnologiya Universitetində (USTC) fizika üzrə doktorluq dərəcəsi alıb və 2013-cü ildə Yaponiyanın Milli Materiallar Elmi İnstitutunda (NIMS) işə başlayıb. O, burada materialşünaslıq və yarımkeçiricilər sahəsində aparıcı tədqiqatlarla məşğul olan ən güclü mərkəzlərdən birində fəaliyyət göstərib.

2016-cı ildə o, institut tarixində ən gənc perspektivli professor kimi tanınıb. 2017-ci ildə ən yaxşı elmi çıxışlardan birinə görə xüsusi mükafat alıb, 2022-ci ildə isə institutun rəsmi şüarının hazırlanmasında iştirak edib.

Mənbələrin yazdığına görə, 2022-ci ildə Da Bo NIMS ilə ABŞ şirkəti "Lam Research” arasında birgə layihəyə cəlb olunub. Bu əməkdaşlıq Tayvanda yerləşən TSMC istehsal müəssisələri üçün 3 nanometr texnologiyalı çiplərin hazırlanmasına dair tədqiqatları əhatə edib. Bu da ona ASML və digər aparıcı şirkətlərin istehsal proseslərinə geniş çıxış imkanı verib.

Eyni dövrdə o, NIMS daxilində çinli alim və mühəndislərdən ibarət komanda formalaşdırıb və onları qabaqcıl texnologiyalar üzrə hazırlayıb.

Daha sonra Da Bo Çinə qayıdaraq bütün komandasını da özü ilə aparıb. O, keçmiş universitetində və Çinin yarımkeçirici sahədə maliyyələşdirilən innovasiya mərkəzlərindən biri olan "Hefei Guojing Instrument Technology” şirkətində vəzifə alıb.

Məlumatda qeyd olunur ki, o, Yaponiyada keçirdiyi dövrlə bağlı bir çox məlumatları ictimai profillərindən silib. Bu isə bəzi ekspertlər tərəfindən onun fəaliyyətinin sadə akademik karyera deyil, uzunmüddətli texnoloji bilik toplama strategiyası kimi qiymətləndirilməsinə səbəb olub.

Çinin "Manhetten layihəsi” kimi qiymətləndirilən yarımkeçirici strategiyası

Məqaləyə görə, bu hadisə Çinin yarımkeçirici sənayesini tam müstəqil ekosistemə çevirmə planının bir hissəsidir. Bu ekosistemə aşağıdakı əsas oyunçular daxildir:

"Huawei” — çip dizaynı mərkəzi;
SMIC — 7 nm səviyyəsinə qədər istehsal edə bilən əsas istehsalçı;
SiCarrier — ASML-ə alternativ litoqrafiya avadanlığı hazırlayan şirkət;
AMEC — Lam Research-a alternativ istehsal materialları təminatçısı;
Naura — Applied Materials-a alternativ istehsal avadanlığı istehsalçısı.

Məlumatda həmçinin qeyd olunur ki, "Huawei” tərəfindən hazırlanan çiplərin 1,4 nanometr səviyyəsinə yaxınlaşdığı və 2031-ci ilə qədər istehsala başlaya biləcəyi bildirilir. Müqayisə üçün, hazırda ən qabaqcıl çiplər 2 nanometr texnologiyasına əsaslanır, TSMC isə 1,4 nanometr mərhələsinə 2028-ci ildə keçməyi planlaşdırır.
//qaynar.azскачать dle 11.3