"Bu gün müzakirə olunan məsələlərlə bağlı bir sıra təklif və təşəbbüslər irəli sürmək istərdim. Birincisi, bütün regionlarda əhali üçün bərabər yaşayış şəraitinin yaradılması kiçik və orta şəhərlərin harmonik inkişafını tələb edir. Bu baxımdan, tərəfdaş ölkələri şəhər inkişafında balanslaşdırılmış urbanizasiya prinsipini geniş şəkildə tətbiq etməyə çağırıram".

Bu fikirləri Özbəkistan Prezidenti Şavkat Mirziyoyev Bakıda WUF13 çərçivəsində keçirilən Liderlər Sammitində bildirib.

"İkincisi, bütün ölkələrin süni intellekt və rəqəmsal transformasiyaya şəhər idarəçiliyində yaratdığı imkanlara bərabər çıxışının təmin edilməsi vacibdir. Bu məqsədlə texnologiyalar, standartlar və təcrübələr sistemi mübadiləsini asanlaşdırmaq üçün beynəlxalq ağıllı və təhlükəsiz şəhərlər alyansının yaradılmasını təklif edirəm.

Üçüncüsü, gənclərin və əhalinin həssas təbəqələrinin keyfiyyətli və əlçatan mənzillə təmin olunması mühüm əhəmiyyət daşıyır. Bu məqsədlə gələn il Səmərqənddə mənzil tikintisinin maliyyələşdirilməsi və investisiya qoyuluşuna dair yeni yanaşmaların müzakirəsi üçün beynəlxalq forum keçirməyə hazırıq.

Dördüncüsü, qlobal iqlim dəyişikliyi fonunda yaşıl şəhərlərin yaradılması üçün ortaq prinsip və standartların qəbul edilməsinə ehtiyac artmaqdadır. Şəhərlərin təbiətlə harmoniyada inkişafını təmin etmək məqsədi ilə BMT-nin Məskunlaşma Proqramının (UN-Habitat) "Yaşıl şəhərlər" beynəlxalq mükafatını təsis etməsini təklif edirəm.

Beşincisi, urbanizasiya səviyyəsinin yüksəldilməsi şəhər daxilində ənənəvi özünüidarə sisteminin rolunu artırır. Bu münasibətlə 2030-cu ildə WUF-un 15-ci sessiyanın şəhərlərin davamlı inkişafında yerli icmaların rolu mövzusu ilə Daşkənddə keçirilməsini təklif edirəm", - deyə Özbəkistan prezidenti təklif edib.скачать dle 11.3