Hava nəqliyyatının son illərin ən böyük logistika problemlərindən biri ilə qarşılaşdığı artıq gizli deyil. Səyahət planı quran milyonlarla insan üçün qeyri-müəyyənlik artarkən, qlobal enerji təchizatındakı problemlər aviaşirkətləri çətin qərarlar qəbul etməyə məcbur edib.

Aviasiya sektorunun aparıcı şirkətlərindən yayılan son məlumatlar bəzi iri hava limanlarında reaktiv yanacaq ehtiyatlarının kritik həddə endiyini göstərib. Belə ki, yaxın günlərdə uçuşunu tamamlayan bir təyyarənin endiyi hava limanında yanacaq tapa bilmədiyi üçün əlavə yanacaq doldurmaq məqsədilə başqa ölkəyə uçmalı olması vəziyyətin ciddiliyini ortaya qoyub. Bu vəziyyət aviaşirkətlərin əməliyyat planlamasını yenidən qurmasına səbəb olur.

Yaxın Şərqdəki siyasi gərginliklərin enerji marşrutlarını iflic etməsi aviasiya sektorunu pandemiya dövrünü xatırladan sınaq qarşısında qoyub. Təchizat zəncirindəki qırılmalar və sürətlə artan qiymətlər səbəbindən "Lufthansa” yalnız yay mövsümü üçün planlaşdırdığı 20 min qısa məsafəli reysi ləğv etməyə məcbur olub. Sektor nümayəndələri yaxın dövrdə dünya üzrə uçuşların təxminən 10 faizinin həyata keçirilə bilməməsi riski ilə üzləşdiyini bildirirlər. Bu isə təxminən 85 min reysin ləğv olunması deməkdir.

Dünya kuboku azarkeşləri üçün xərc kabusu

Yanacaq ehtiyatlarındakı azalma yaxınlaşan idman tədbirlərinə də birbaşa təsir göstərir. Xüsusilə Şimali Amerikada keçiriləcək futbol üzrə Dünya çempionatına getməyi planlaşdıran azarkeşlər üçün vəziyyət ürəkaçan deyil. Böyük banklar reaktiv yanacaq səviyyələrinin təhlükəli həddə çatdığını açıqlayarkən, ABŞ, Meksika və Kanada arasında uçuş marşrutlarında aviabilet qiymətlərinin sürətlə artdığı müşahidə olunur. Otel qiymətlərindəki kəskin bahalaşma və turnir biletlərinin yüksək qiyməti ilə birlikdə uçuş xərclərinin artması bir çox futbol azarkeşinin planlarını dəyişməsinə və ya səfərdən tamamilə imtina etməsinə səbəb ola bilər.

Hökumətlər isə yaranmış vəziyyəti idarə etmək üçün mübahisəli üsullara əl atırlar. Böyük Britaniya kimi ölkələr aviaşirkətlərə müxtəlif reyslərin sərnişinlərini bir təyyarədə birləşdirməyə icazə verərək yanacağa qənaət etməyə çalışır. Siyasi müstəvidə Hörmüz boğazında təhlükəsizliyin təmin olunması istiqamətində səylər hələ nəticə vermədiyi halda, səyahət mütəxəssisləri sərnişinlərin istənilən anda son dəqiqə dəyişikliklərinə hazır olmalı olduqlarını bildirirlər.//qaynar.azскачать dle 11.3