Dövlətin iqtisadi dayanıqlılığının təmin olunmasında vergi sisteminin rolu əvəzsizdir. Lakin vergi ödəyicilərinin bəzən müxtəlif səbəblərdən öhdəliklərini vaxtında yerinə yetirə bilməməsi vergi borclarının yaranmasına səbəb olur. Bəs bu halda vergi orqanı hansı tədbirləri görür və hansı mərhələdə məsuliyyət yaranır?

Mövzu ilə bağlı "Azad Azərbaycan" (ATV) telekanalının hazırladığı videomaterialda vergi ödəyicilərini maraqlandıran suallara aydınlıq gətirilib.

Vergi orqanları borclarla bağlı vergi ödəyicisini müxtəlif vasitələrlə vaxtında məlumatlandırır və xəbərdarlıq edir. Hüquqşünas Şulan Nağıyevin sözlərinə görə, borc ödənilmədikdə ilk addım bank hesablarına sərəncam qoyulmasıdır.

Hüquqşünas sərəncamların iki əsas növünü izah edib:

İcra olunmalı sərəncam: Vergi ödəyicisinin bank hesabında olan vəsaitdən vergi borcunun və onun 105 faizi həcmində vəsaitin silinərək büdcəyə köçürülməsidir. Bu addım vergi ödəyicisinin razılığı olduqda və ya borcun 30 gün ərzində məhkəmədə mübahisələndirilmədiyi təqdirdə icra olunur.

Dondurulmalı sərəncam: Vergi ödəyicisi 30 gün ərzində borcu məhkəməyə şikayət edərsə və ya yazılı razılığı olmazsa, vəsait yalnız dondurulur (silinmir).

Sərəncamlar ödəyicinin bütün bank hesablarına göndərilir və borc ödənildikdən sonra aradan qaldırılır. Əgər bu tədbirlər borcun ödənilməsinə kifayət etməzsə, qanunvericilikdə nəzərdə tutulan digər məcburi tədbirlərə əl atılır.

Vergi ödəyicilərinin inzibati qərarlardan narazı qaldıqları təqdirdə, 30 gün müddətində məhkəməyə müraciət etmək hüquqları var. Lakin öhdəliklərdən yayınma halları daha ağır nəticələrə yol aça bilər. Şulan Nağıyev vurğulayır ki, cinayət məsuliyyəti yarandıqda vergi ödəyicilərini müxtəlif məbləğlərdə cərimələr, ən ağır hallarda isə beş ildən yeddi ilə qədər azadlıqdan məhrumetmə cəzası gözləyə bilər.
скачать dle 11.3