Fəvvarədə çimmək ölümlə nəticələnə bilər - Mütəxəssisdən xəbərdarlıq

Fəvvarələrdə çimmək sağlamlıq üçün ciddi risklər yarada bilər. Belə ki, həmin sularda yosunların və digər mikroorqanizmlərin çoxalmasının qarşısını almaq məqsədilə xüsusi kimyəvi maddələrdən istifadə olunur.

Bu barədə rusiyalı həkim Andrey Tyajelnikov öz "Telegram" kanalında məlumat verib.

Onun sözlərinə görə, fəvvarələrdəki su daim yenilənmir, qapalı dövriyyə sistemi ilə hərəkət edir və müəyyən mənada durğun vəziyyətdə qalır.

Mütəxəssis əlavə edib ki, fəvvarələrdə çimmək təkcə infeksiya riski yaratmır. Nəm və sürüşkən səthlər səbəbindən insanların yıxılaraq müxtəlif xəsarətlər alması da mümkündür.

Onun sözlərinə görə, belə hallarda burxulma, əzələ dartılması və hətta sınıqlar baş verə bilər.

Andrey Tyajelnikov fəvvarələrdə istifadə olunan elektrik avadanlıqlarının da təhlükə mənbəyi olduğunu vurğulayıb.

"Fəvvarələrdə nasoslar və digər elektrik qurğuları fəaliyyət göstərir. İzolyasiyanın zədələnməsi ehtimalı hər zaman mövcuddur. Belə bir vəziyyətdə fəvvarədə olmaq həyati təhlükə yarada bilər", - deyə o xəbərdarlıq edib.