İsrail Hərbi Hava Qüvvələri Tehranın mərkəzində bir neçə küçəni əhatə edən hökumət binaları kompleksinə zərbələr endirib.

Bu barədə İsrail Müdafiə Qüvvələri (SAXAL) məlumat yayıb.

"İsrail Hərbi Hava Qüvvələri Tehranın mərkəzində yerləşən İran obyektlərinə zərbələr endirib. Hücum zamanı prezident iqamətgahına və Ali Milli Təhlükəsizlik Şurasının binasına çoxsaylı mərmilər atılıb. Zərbələr zamanı yüksəksəviyyəli təhlükəsizlik qərarları qəbul edənlərin toplantı yeri, eləcə də İranın hərbi zabitləri üçün təlim mərkəzi hədəfə alınıb", - deyə SAXAL-dan bildirilib.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. SAXAL zərbələri təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.
скачать dle 11.3