Yeni araşdırmaya görə, sosial şəbəkə istifadəçilərinin vərdişlərində nəzərəçarpan parçalanma yaşanır. İlon Maskın X platformasından istifadə edənlərin sayı azalır, əvəzində "TikTok” və "Reddit” populyarlıq qazanır.

Qaynarinfo xəbər verir ki, bu barədə "Axios" yazıb.

Beş min yetkin amerikalı arasında keçirilmiş sorğuya əsasən, respondentlərin cəmi 20%-i hazırda X-ə daxil olduqlarını bildirib. Bu göstərici əvvəlki illərlə müqayisədə xeyli aşağıdır. Eyni zamanda "Reddit” istifadəçilərinin payı 26%-ə yüksəlib (dörd il əvvəl 18% idi) ki, bu da onu X üçün əsas alternativlərdən birinə çevirir.

"YouTube” ABŞ yeniyetmələri və 18–29 yaş arası gənclər arasında ən geniş istifadə olunan platforma olaraq qalır (95%). Bununla belə, "TikTok” sürətlə populyarlıq qazanır: 30 yaşdan aşağı olanların 63%-i bu qısa video platformasından aktiv istifadə edir və onların yarısı hər gün ən azı bir dəfə "TikTok”a daxil olduğunu bildirir.

Bu dəyişikliyin səbəbləri istifadəçi vərdişlərinin dəyişməsi ilə bağlıdır. Gənclər və 30 yaşa qədər olanlar getdikcə daha çox video məzmun, qısa format və aktiv icmalara malik platformalara — "YouTube” və "Reddit”ə — üstünlük verirlər.

Bundan başqa, "rəqəmsal məkanın parçalanması” müşahidə olunur: sosial şəbəkələr artıq geniş auditoriyanı bir yerdə cəmləşdirən universal meydançalar deyil — indi hər nəsil və qrupun öz platforması var. Bu isə şirkətlər, brendlər və geniş auditoriyaya çıxmağa öyrəşmiş ictimai fiqurlar üçün işi çətinləşdirir.

Maraqlıdır ki, "Reddit” və "YouTube”un yüksəlişi təkcə "ünsiyyətin populyarlığı” ilə bağlı deyil. Bu platformalardakı məzmun böyük dil modellərinin — o cümlədən ChatGPT kimi sistemlərin — öyrədilməsində getdikcə daha çox istifadə olunur. Bu isə onların təsirinin sırf "sosial şəbəkə” hüdudlarından kənara çıxdığını göstərir: bu platformalar həm insanlar, həm də alqoritmlər üçün informasiya gündəmini, konteksti və trendləri formalaşdırmağa başlayıb.скачать dle 11.3