İran son illərin ən ağır quraqlıq dövrünü yaşayır və buna görə də ölkədə yağıntıların yağması üçün bulud əkini işlərinə başlanılıb.

Median.Az IRNA agentliyinə istinadən xəbər verir ki, ilk bulud əkini əməliyyatı uzunmüddətli quraqlıq səbəbindən əhəmiyyətli dərəcədə dayazlaşan və duz səhrasına çevrilən Urmiya gölü (İranın ən böyük gölü) ərazisində həyata keçirilib.

Bildirilir ki, Urmiya gölündə suyun səviyyəsinin artırılması üzrə işlər digər əyalətlərdə də davam etdiriləcək. Növbəti əməliyyatların Şərqi və Qərbi Azərbaycan əyalətlərində keçirilməsi planlaşdırılır.

Daha əvvəl İran Meteorologiya Xidməti ölkədə son 50 ilin ən quraqlıq payızının müşahidə olunduğunu açıqlamışdı. Yağıntıların səviyyəsi çoxillik orta göstərici ilə müqayisədə 89% azalıb.

Yaxın Şərqdə su ehtiyatlarının azalması və iqlim dəyişikliyinin nəticələri yağıntı yaratma metodları məsələsində ölkələr arasında gərginlik mövzusuna çevrilir. İran rəhbərliyi keçmişdə İsrail və BƏƏ-ni bulud əkini vasitəsilə yağışa müdaxilədə ittiham edib və buludların İrana çatmazdan əvvəl yağıntı buraxdığını iddia edib.скачать dle 11.3