Avstraliyanın mərkəzində alimlər böyük həcmdə nioqium yataqları aşkarlayıblar. Bu metal müasir texnologiyaların əksəriyyəti üçün vacibdir. Tədqiqatçılar hesab edirlər ki, yataqlar təxminən 830 milyon il əvvəl superkontinent Rodiniyanın parçalanması nəticəsində formalaşıb.
Qaynarinfo "Live Science" portalına istinadən xəbər verir ki, tapıntı barədə məqalə 2 sentyabrda "Geological Magazine" jurnalında dərc olunub. Burada karbonatit süxurlarında zəngin nioqium ehtiyatlarının mövcudluğu təsdiqlənib.
Nioqium gümüşü rəngli, korroziyaya davamlı, superkeçirici xassələrə malik metaldır. O, əsasən poladın möhkəmləndirilməsində istifadə olunur, həmçinin MRT skanerləri və hissəcik sürətləndiricilərinin istehsalı üçün vacibdir.
Hazırda dünya üzrə nioqiumun 90 faizi Braziliyadakı bir mədəndə, qalanı isə Kanadada hasil olunur. Almaniyanın Gettingen Universitetindən alim Maksimilian Drellner qeyd edir ki, Avstraliyada bu yataqların necə və nə vaxt yarandığını anlamaq yeni mənbələrin axtarışına kömək edə bilər.
Adətən nioqium az miqdarda müxtəlif süxurlarda rast gəlinir, lakin sənaye miqyasında hasilat üçün əsas mənbə karbonatitlərdir. Bu süxurlar yerin dərin qatlarında yerləşir və yalnız kəşfiyyat qazıntıları ilə aşkar edilə bilir.
Avstraliyanın Aileron bölgəsində iki yeni yataq müəyyən olunub:
* Luni yatağında təqribən 200 milyon ton nioqium olduğu ehtimal edilir.
* Daha kiçik Krien yatağında isə təxminən 3,5 milyon ton metal mövcuddur.
Şahidi olduğunuz hadisələri çəkib bizə göndərin!
Son Əlavə