"Benfika" - "Boka Xuniors" görüşündə qalib müəyyən olunmadı

Klublararası dünya çempionatının qrup mərhələsinin ilk turunda Portuqaliyanın "Benfika" klubu Argentinanın "Boka Xuniors"u ilə 2:2 hesabı ilə bərabərə qalıb. Qarşılaşma ABŞ-nin Florida ştatındakı "Mayami Qardens"də baş tutub.

Argentina təmsilçisinin qollarını Migel Merentiel (21-ci dəqiqə), Rodriqo Battaqlia (27), "Benfika"nın qollarını isə Anxel Di Maria (45+3, penalti), Nikolas Otamendi (84) vurub. 72-ci dəqiqədə "Benfika"nın italiyalı hücumçusu Andrea Belotti, 88-ci dəqiqədə isə "Boka Xuniors"un müdafiəçisi Nikolas Fiqal qırmızı vərəqə alaraq meydandan qovulub.

C qrupunda daha əvvəl Almaniyanın "Bavariya"sı Yeni Zelandiyanın "Ouklend Siti" klubunu 10:0 hesabı ilə məğlub edib. Növbəti matçda "Benfika" iyunun 20-də "Oklend Siti", iyunun 21-i gecə isə "Boka Xuniors" "Bavariya" ilə qarşılaşacaq.

Günün digər oyununda Braziliyanın "Flamenqo" klubu Tunisin "Esperans" klubuna 2:0 hesabı ilə qalib gəlib.

ABŞ-də keçirilən Klublararası dünya çempionatında ilk dəfədir ki, səkkiz qrupa bölünən 32 komanda iştirak edir. Hər kvartetdən iki ən yaxşı komanda 1/8 finala yüksələcək. Final qarşılaşması iyulun 13-də baş tutacaq.