Külli miqdarda qızılı qaçaqmalçılıq yolu ilə ölkə ərazisinə keçirməkdə təqsirləndirilən Əfsər Mirzəliyevin və Səfər Səfərovun cinayət işinin məhkəmə baxışı keçirilib.
Bakı Ağır Cinayətlər Məhkəməsində hakim Nigar İmanovanın sədrliyi ilə keçirilən prosesdə prokuror təqsirləndirilənlərə ittiham aktını elan edib.
Ə.Mirzəliyev və S.Səfərov özlərini təqsirli bilməyiblər.
Qeyd edək ki, Dövlət Gömrük Komitəsinin sabiq əməkdaşı Əfsər Mirzəliyev qaçaqmalçılıqla qızılları gömrük nəzarətindən kənar ölkəyə keçirməkdə Səfər Səfərova yardım etməkdə təqsirləndirilir.
İstintaq materiallarından bəlli olub ki, S.Səfərov gömrük nəzarət-buraxılış məntəqəsindəki yoxlamadan yayınaraq, hava limanındakı sanitar qovşaqlarından birinə daxil olub və üzərindəki zinət əşyaları olan bağlamanı zibil qutusuna atıb. Onun bu əməli gömrük nəzarətçiləri tərəfindən aşkar olunaraq sənədləşdirilib.
İstintaqla o da müəyyən edilib ki, Səfər Səfərova qaçaqmalçılıqla qızılı gömrük nəzarətindən kənar keçirməyə yardım edən DGK-nın sabiq məmuru Əfsər Mirzəliyev olub.
Məhkəmədə sərbəst ifadə verən şahid DGK-nın əməkdaşı olduğunu deyərək, hadisə baş verən gün xidmətdə olduğunu bildirib:
"Səfər Səfərovu biz saxlayaraq idarəyə apardıq. Daha sonra mənə bildirdilər ki, hava limanında ayaqyoluna yaxınlaşaraq zibil qutusuna baxış keçirim. Mən həmin zibil qutusuna baxanda qara bükülü sellofan torba aşkar edərək təhvil verdim. Sonra məlum oldu ki, qızılları xadimə görübmüş".
Digər şahid, DGK-da mühafizəçi vəzifəsində çalışan şəxs ifadəsində bildirib ki, təqsirləndirilən Səfər Səfərovu əvvəllər də tanıyıb. Hava limanında çalışdığını bildirən şahid onun qızıl gətirməyi ilə bağlı hər hansı bir məlumatının olmadığını deyib. Ona telefon gətirməyi sifariş etdiyini bildirib.
Şahidin ifadəsində ziddiyyətlər olduğundan onun ibtidai istintaqa verdiyi ifadəsi məhkəmədə elan edilib.
Şahidin istintaqdakı ifadəsindən bəlli olub ki, Səfər Səfərov telefon vasitəsilə onunla danışaraq qızıl gətirmək istədiyini bildirib və buna görə də ondan hava limanındakı müəyyən maneələrdən keçməyə yardım istəyib. Şahidin ifadəsindən o da bəlli olub ki, o bu sövdələşməyə razı olmayıb.
Şahid bu ifadəsini danaraq istintaqda belə bir ifadə vermədiyini deyib.
"Mən onunla heç bir qızıl söhbətini etməmişəm, o mənə telefon gətirməli idi, bu barədə danışmışıq".
Qeyd edək ki, Səfər Səfərov 22 dekabr 2024-cü ildə İstanbul-Bakı aviareysi ilə Heydər Əliyev adına Beynəlxalq Hava Limanına gələrək üzərində gətirdiyi ümumilikdə 461 min manat dəyərində olan 41 ədəd qızıl külçəni qaçaqmalçılıq yolu ilə ölkə ərazisinə keçirərkən saxlanılıb.
Təqsirləndirilən şəxslər Baş Prokuror yanında Korrupsiyaya qarşı Mübarizə Baş İdarəsi tərəfindən cinayət məsuliyyətinə cəlb ediliblər. Onlar barəsində Cinayət Məcəlləsinin 206.3.2 (qabaqcadan əlbir olan bir qrup şəxs tərəfindən qaçaqmalçılıq), 206.3.3-cü (vəzifəli şəxs tərəfindən qulluq mövqeyindən istifadə edilməklə qabaqcadan olan bir qrup şəxs tərəfindən qaçaqmalçılıq) maddələri ilə ittiham elan edilib, barələrində həbs qətimkan tədbiri seçilib.
//oxu.az
Şahidi olduğunuz hadisələri çəkib bizə göndərin!
Son Əlavə